Новото лице на сениорската фудбалска репрезентација на Македонија вечерва со премиерно издание. Предводена од Горан Пандев и Илија Несторовски и надополнета со младите херои од Полска ќе излезе на мегдан на Израел во седмиот настап во квалификациите за Светското првенство во Русија во 2018 година. Мечот на „Сами Офер“ стадионот во Хаифа почнува во 20,45 часот, термин во кој ќе играат и Шпанија и Италија на „Сантијаго Бернабеу“ во дербито во групата Г. Претходно, од 18 часот, Албанија го дочекува Литхенштајн во Елбасан.
„Имавме игра и создававме шанси во Скопје, но победи нашиот вечерашен домаќин. Зад нас се добри подготовки, верувам во овие момчиња, очекувам повторување на изданието против Израелците од првиот меч, но овојпат и да реализираме и да извлечеме позитивен резултат“, коментира селекторот Игор Ангеловски пред денешниот реванш со Израел.
Желбата за успех, за победа во спортот, човечки, е секогаш да биде присутна. Неспорно е дека е така и во случајот со македонските репрезентативци, само е потребно и трпение да не се согори во неа. Сеќавањата од поразот од Израел на „Телеком арена“ се сè уште свежи. „Црвено-жолтите“, според играта, заслужија барем бод и имаа прилика за освојување меѓутоа Јаховиќ не реализира пенал во последната минута за провлекување на Израелците во Скопје (1:2). Хемед и Бен Хаим беа стрелци на двата гола за противникот, Несторовски во 63 минута погоди за Македонија.
„Ќе биде тешко. Во тоа нема сомневање. Израел има репрезентација за респект што среќно победи во Скопје. Не заслуживме да бидеме поразени во тој натпревар. Очекувам да биде поразлично вечерва. За добар резултат е потребна колективна игра и концентрација во текот на сите 90 минути. Се надевам дека ќе одиграме комплетен меч“, најави капитенот Горан Пандев.
Македонија е претпоследна во групата Г со три бода што ги освои против Лихтенштајн. Циклусот е завршен и за останатите селекции во неа од аспект на шансите за СП 2018. Единствената дилема што преостанува е меѓу Шпанија и Италија и се однесува на тоа која ќе патува директно во Русија, а која ќе игра бараж.
Меѓу останатите шест дуели од денешната квалификациска програма и неколку директни од кои ќе зависи изгледот на табелата во групата Д и групата И како на пример судирот на Велс и Австрија во Кардиф и особено во Харков каде Украина ја пречекува Турција.
Квалификации за СП 2018 – денеска играат
Група Д, 7 коло
Србија – Молдавија (18 ч.)
Грузија – Република Ирска (18 ч.)
Велс – Австрија (20,45 ч.)
Табела: Србија 12, Република Ирска 12, Велс 8, Австрија 8, Грузија 3, Молдавија 2.
Група Г, 7 коло
Албанија – Лихтенштајн (18 ч.)
Израел – Македонија (20,45 ч.)
Шпанија – Италија (20,45 ч.)
Табела: Шпанија 16, Италија 16, Албанија 9, Израел 9, Македонија 3, Лихтенштајн 0.
Група И, 7 коло
Финска – Исланд (18 ч.)
Хрватска – Косово (20,45 ч.)
Украина – Турција (20,45 ч.)
Табела: Хрватска 13, Исланд 13, Турција 11, Украина 11, Финска 1, Косово 1.