Вардар го комплетира стручниот штаб пред почетокот на настапите во групната фаза во Лига Европа. Нови соработници на Чедомир Јаневски се Белгиецот Стефан ван дер Хејден (асистент) и Мане Манев (тренер на голмани) кој доаѓа на местото на Саша Илиќ.
Ван дер Хејден се придружи на македонскиот фудбалски шампион од белгиската сцена каде има работено како асистент во Локерен, Беверен и Бриж. Покрај настапи за неколку екипи во Жупилие лигата, одигра и четири напревари за националниот тим.
Работата со голманите му е доверена на Мане Манев, личност со долг стаж во, пред се, домашниот фудбал, но и со ангажман во репрезентацијата на Македонија во минатото.
Во стручниот штаб на „црвено-црните“ остануваат Александар Влахо чии работни обврски во иднина ќе биде анализа и скаутирање, Александар Васоски останува асистент како и кондицискиот тренер, Михајло Костиќ кој и досега беше задолжен за физичката подготовка на фудбалерите.
Вардар наредниот четврток (14 септември) го дочекува Зенит од Санкт Петербург во првото коло од групата Л во УЕФА Европа лигата.