Паузата за репрезентативни активности, се чини, не годеше за екипата на Милан за која ниту 200. милиони евра вредни засилувања од преодниот рок не беа од помош за избегнување на дебакл во Рим. Лацио ги декласира „росонерите“ со 4:1 во меч од третото коло во Серија А и со уверливата партија на „Олимпико“ даде до знаење дека се наоѓа во одлична форма.
https://www.youtube.com/watch?v=N2Wp2Jl1aRo
„Небесно-синиот“ дел од Вечниот град го слави капитенот Чиро Имобиле кој трипати ја проби гостинската одбрана на „командантот“ Леонардо Бонучи. Италијанскиот репрезентативец погоди во 38 минута, в0 42 минута и во 48 минута, две минути по комплетирање на хет-трикот дојде реализација и од Луис Алберто. Почесниот погодок за тимот од Милано беше дело на Рикардо Монтоливо во 56 минута.
Најубедливата победа во третата рунда во продукција на Фиорентина. „Виолетовите“ од Фиренца испалија „петарда“ на „Бентегоди“ во Верона против истоимениот домаќин за прва радост во новата сезона. Голеадата ја отвори Џовани Симеоне уште во втората минута на кого се надоврзаа Сирил Теро во десеттата., Давиде Астори во 24., Џордан Верето во 62. и Жил Бастиао Диаж во 89.
Удинезе ја порази Џенова на Горан Пандев со 1:0. Јанкто во 16 минута го постигна единствениот гол на стадионот „Фриули“ во Удине. Предводникот на македонскиот национален тим беше стартер кај џеновјаните и одигра 39 минути. Неговата замена беше принудна за тренерот Иван Јуриќ кој мораше да реагира по исклучувањето на Андреа Бертолачи две минути претходно.
Серија А, 3 коло
Беневенто – Торино 0:1
Лацио – Милан 4:1
Верона – Фиорентина 0:5
Удинезе – Џенова 1:0
Калјари – Кротоне 1:0
Аталанта – Сасуоло 2:1
Интер – Спал 2:0
Јувентус – Киево 3:0
Болоња – Наполи (во тек)
Сампдорија – Рома (одложено поради дожд)
Табела: Јувентус 9, Интер 9, Лацио 7, Торино 7, Наполи 6 (-1), Сампдорија 6 (-1), Милан 6, Болоња 4 (-1), Спал 4, Рома 3 (-1), Фиорентина 3, Удинезе 3, Аталанта 3, Киево 3, Калјари 3, Џенова 1, Сасуоло 1, Кротоне 1, Верона 1, Беневенто 0.