Металург го положи оружјето и во вториот настап во групата Д во ракометната Лига на шампиони. Македонскиот вицепрвак овојпат согоре во сопствениот погон и загуби на домашен терен од Бешикташ со 27:31 (полувреме 14:14). Понесени од силната желба за победа, како што кажа и самиот Лино Червар, „металурзи“ уште од почеток „загубија глава“ во ВИП арената „Борис Трајковски“, а кога работата ќе тргне на криво, на криво и ќе заврши. Брзоплетост, нереализирани пенали и египетскиот голман Хендави внесоа немир кај тимот од Автокоманда, но затоа го овозможија потребниот мир на гостите од Истанбул. Удел во конечниот исход да биде каков е имаше и искуството што беше на страна на турската екипа и лошиот ден на голманите Томовски и Арсиќ.
„Пресуди поголемото искуство што го имаат. Нашиот голман не фати ниту една топка во првото полувреме, нивниот беше најдобар поединец на теренот. Се истрошивме додека израмниме, а потоа нè напушти и концентрацијата. Во завршницата немавме памет, во одбрана примавме лесни голови, во напад се мачевме, па казната стигна. Не сме исклучок дека не сакаме да губиме. Никој не сака порази. Затоа ќе мора да продолжиме со напорна работа и да бидеме трпеливи“, рече Лино Червар по средбата.
Халил Јагањац беше најсветла точка во ростерот на Металург, и воопшто на натпреварот, со девет гола. Кузмановски и Илиќ реализираа по четири, Палевски и Гуглета по три, поддршката од останатите изостана. Особено ова важи за голманскиот двоец Томовски и Арсиќ кои завршија со само четири интервенции, сите на српскиот интернационалец. Нуиќ и Доне со 7 погодоци и Прибак со шест беше тројката на Бешикташ што ја „тероризираше“ одбраната на металурзи, огромен придонес за триумфалното гостување во Скопје имаше и голманот Хендави кој фати десет топки од игра и три седмерци.
„Финишот на првото полувреме беше наш најдобар период. „Издишавме“ во второто и немавме сили да го задржиме темпото. Отсуствуваше и агресивност во одбраната, па Бешикташ заслужено победи на крајот. Пред нас е уште многу работа за развој во посакуваната насока“, самокритичен беше и Јагањац.
Со свој коментар и македонскиот репрезентативец, Немања Прибак кој беше меѓу најзабележителните во екипата на Бешикташ.
„Ние сме поискусни за нијанса, Металург повеќе трчаше во натпревар на екипи што играат на приближно исто ниво. Почнавме добро, зад нас имавме расположен голман, казнивме доста грешки на домашната екипа и заслужено победивме“, изјави Прибак по средбата.
Металург ќе биде домаќин и во третото коло од групата Д. Наредниот викенд (сабота, 17,30 ч.) во Скопје ќе гостува Спортинг Лисабон кој викендот, исто така, загуби на домашен терен од Мотор Запорожје со 23:31.
Металург – Бешикташ 27:31 (14:14)
ВИП арена „Борис Трајковски“. Гледачи: 2.000. Судии: Дмитри Набокау и Шархеи Кулик (двајцата од Белорусија).
Металург: Томовски, Арсиќ (4 одбрани), Петров, Дрогришки, Јагањац 9, Лапајне, Токиќ, Танкоски 1, Кузмановски 4, Илиќ 4, Анѓелиќ 2, Велковски 1, Пешевски, Палевски 3, Гуглета 3, Димитриевски. Тренер: Лино Червар.
Бешикташ: Каратај, Гунај, Хендави (10 одбрани, 3 седмерци), Вразалиќ 2, Прибак 6, Крсманчиќ 3, Буљубашиќ, Демирезен, Радојковиќ 2, Езбахар 4, Ерсин, Кесер, Нуиќ 7, Томиќ, Доне 7. Тренер: Мевлут Муфит Арин.
Лига на шампиони, 2 коло
Група А
Вардар – Нант 27:23
Барселона – Кристијанштад 31:29
Рајн Некар Левен – Висла Плоцк 31:27
ППД Загреб – ПИК Сегед 23:28
Табела: Вардар 4, Рајн Некар Левен 3, Барселона 3, ПИК Сегед 2, Нант 2, Кристијанштад 1, ППД Загреб 1, Висла Плоцк 0, .
Група Б
Веспрем – Фленсбург 28:27
Алборг – Целје 32:30
ПСЖ – Мешков Брест 32:28
Виве Кјелце – Кил 32:21
Табела: Веспрем 4, ПСЖ 4, Виве Кјелце 2, Фленсбург 2, Алборг 2, Мешков Брест 2, Целје 0, Кил 0.
Група Ц
Динамо Букурешт – Горење Велење 26:27
Елверум – Скјерн 27:32
Адемар Леон – Шафхаузен 29:28
Табела: Скјерн 4, Горење Велење 4, Шафхаузен 2, Адемар Леон 2, Елверум 0, Динамо Букурешт 0.
Група Д
Чеховски медведи – Монпелје 24:28
Металург – Бешикташ 27:31
Спортинг Лисабон – Мотор Запорожје 23:31
Табела: Мотор Запорожје 4, Монпелје 4, Бешикташ 2, Спортинг Лисабон 2, Металург 0, Чеховски медведи 0.