Во моментов во кабинетот на Владимир Панчевски, поранешниот претседател на Кривичниот суд, Специјалното јавно обвинителство и Министерството за внатрешни работи вршат претрес, дознава НОВА ТВ.
Според нашите информации, претрес има и во неговиот дом, поради сомение за оддавање на службена тајна, од страна на Панчевски и уште две лица од Кривичниот суд, кои не биле судии. Пред Кривичниот суд дојде и возило на итната помош, бидејќи наводно на Панчевски му се слошило.
Владимир Панчевски четири години беше претседател на Кривичниот суд. Тој според имотниот лист доставен до Антикорупциската комисија е најбогатиот судија, а на неговото богатство кое вреди над едем милион евра можат да му позавидат и некои поимотни бизнисмени. Тој претседателската функција во Кривичниот суд ја презеде во 2012 година, период во кој од бомбите на СДСМ беше обелоденето дека речиси секој судија за да биде именуван бил запишан во тефтерот на екс министерката Гордана Јанкулоска.
Панчевски во изминатава година и половина, откако беше формирано Специјалното јавно обвинителство, постојано е прозиван дека е извршител на нарачките на власта и кочничар за случаите кои ги отвори СЈО.
Од судот на чие чело е тој се одбиваа речиси сите барања за мерки за претпазливост, притвор, увид во предмети, налози за претрес, изземање на судии кои ги доставува Катица Јанева. И постојано излегува со соопштенија со политички квалификации за неговите колеги од СЈО, кои ги обвинува дека се нестручни и тенденциозни.
Владимир Панчевски од 2003-2008 година работи во Министерството за финансии, во одделот на финансиска полиција. Неговото прво вработување во Кривичниот суд е од 2008 година каде што една година работи како истражен судија. Со доаѓањето на Лидија Неделковска за Претседателка во Кривичниот суд, Панчевски е прераспореден во Одделот за организиран криминал и му се доделени дел од најзначајните предмети од организиран криминал. Постапува во повторената постапка за случајот „Армиско оружје“, како и случајот „Пепел“ 2 во кој му се судеше на кумановскиот тутунски бос Бајруш Сејдиу.