Според првите проценки на австриската национална телевизија младиот 31-годишен Себастијан Курц победи на парламентарните избори во Австрија.
Тој најверојатно ќе биде новиот австриски премиер и најмладиот премиер во Европа. А со тоа и десницата се враќа на власт во оваа земја. Но за да може Курц да седне во премиерската фотелја најверојатно ќе треба да влезе во коалиција со екстремната десница на Хајнц-Кристијан Страше.
Партијата на Курц освоила 30.2 отсто гласови а на второ место е екстремната десница ФПО со 26.8 отсто гласови. Социјалистите на Кристиан Керн добиле 26.3 отсто гласови.
Курц досега не исклучи ниту една опција за коалиција па така коалицијата со ФПО се смета за најверојатна.
Да потсетиме дека екстремно десната партија, на чело со Јерг Хајдер, влезе во австриската влада во 2000 година со канцеларот Волфганг Шисел. Оваа одлука донесе бран критики во ЕУ која воведе санкции за Австрија.
За влезот екстремната десница во австриската влада во 2000 година тогашниот белгиски министер за надворешни работи Луи Мишел изјави дека нема да оди на скијање во Австрија се додека екстремната десница е во владата.
Но денес, во повеќе европски земји во парламентите влегоа екстремни и популистички партии па сега не може да се очекува ваков став од ЕУ кон Австрија.
Курц успеа да мобилизира големо гласачко тело со неговиот анти-мигрантски став а помеѓу нив и гласачи на екстремната десница.
Курц стана министер за надворешни работи во 2013 година а во 2015 година почна остро да ја критикува политиката на прием на мигранти во Германија. Тој се смета за заслужен за затворањето на балканската рута за мигрантите. Неговите посети во Македонија во тоа време беа доста чести. Тој и даваше поддршка на ВМРО-ДПМНЕ а присуствуваше и на митинзите на оваа партија пред ланските избори.
Курц ја присвои политиката на екстремната десница до мерка која му донесе критики од оваа партија која тврдеше дека Курц направил плагијат.
Резултатот на Хајнц-Кристијан Страше е повторување на успехот на Јерг Хајдер од 1999 година. Тој изјави дека ќе бара повеќе клучни министерства како надворешни и внатрешни работи.
Конзервативниот австриски весник Стандард предупредува дека Страше како партнер во владата не била добра одлука и дека би донела повторно многу критики во ЕУ. Но, прашање е дали Курц ќе има избор, додава весникот.
Повеќе мали партии како зелените и либералите влегуваат во парламентот но, според досегашните проценки по изборите, тие нема да можат да бидат алтернатива за ФПО за Страше.