Социјалните мрежи Фејсбук и Твитер како и компанијата Гугл одиграле далеку подлабока улога во претседателската кампања на Доналд Трамп отколку што претходно беше објавено, покажува анализа која наскоро ќе биде објавена, пишува „Политико“.
Анализата, базирана на повеќе десетици интервјуа со вработени во технолошките компании кои работеле во неколку претседателски кампањи во 2016 година, се очекува да даде нова слика за помошта која Трамп ја добил при неговата изненадувачка победа минатиот ноември.
Иако според компаниите се работи за стандардна практика да работат со реклами за време на политичките кампањи, новото истражување покажувало како ангажираните вработени, често дејствувале како политички оперативци сугерирајќи методи за како да се придобијат гласачите онлајн.
Токму ваквата поддршка била од клучно значење за кампањата на Трамп која најпрво не инвестираше во дигитални операции, но подоцна широко ги употреби Фејсбук, Твитер и Гугл за време на изборите, покажува анализата изработена од професори кои работат во Универзитетот на Северна Каролина и Универзитетот на Јута.
Иако компаниите таквите услуги ги имале понудено на сите кандидати, според студијата, кампањата на Хилари Клинтон не сакала да ги ангажира вработените на овие компании во нејзините операции и одлучила самите да си го работат тоа.
„Фејсбук, Твитер и Гугл отидоа подалеку од само промовирање на своите услуги“, се вели во студијата, со надополнување дека тие активно учествувале во комуникацијата за време на кампањата преку нивна тесна соработка со политичките службеници ангажирани од кандидатите.
„Степенот до кој тие помогнале на кандидатите беше изненадување за нас“, вели коавторот на анализата, Даниел Крејс.
Крејс и професорот Шенон Мекгрегор интервјуирале ангажирани лица од компаниите кои работеле со логистиката на Трамп, Клинтон како и со соработниците на Берни Сандерс, Тед Круз и Марко Рубио.
Анализата која треба наскоро да биде објавена, фрла дополнителна сенка врз влијателните Фејсбук, Твитер и Гугл кои по изборот на Трамп, секојдневно се соочуваат со обвинувања дека активно овозможиле да се шират „лажни вести“ во корист на Трамп а против Хилари Клинтон.
Сите три компании преку свои претставници следната недела ќе бидат сослушувани од страна на комисија формирана од американскиот Конгрес, а фокусот е нивната поврзаност со Русија и вмешаноста во изборите во САД.