Фил Невил со „отровни стрели“ кон Челзи за трансферната политика во летниот преоден рок. Реакцијата на поранешниот дефанзивец на „црвените ѓаволи“ доаѓа по убедливиот пораз на „сините“ од Рома во Лигата на шампиони и во основа се однесува на Немања Матиќ кој на крајот на јули се пресели од „Стемфорд бриџ“ на „Олд трафорд“ за сума од 40,23 милиони фунти.
„Каде тргна лошо по Челзи? – Има еден збор. Матиќ“, изјави Фил Невил за „Би-Би-Си 5 лајф“.
Иако е рано да се говори, сепка, се чини, дека Челзи ја губи контролата врз тронот во англиската Премиерлига. Лондонските „сини“ веќе имаат три порази во десет меча и се четврти на табелата со девет бода минус во однос на Манчестер сити на лидерската позиција. Според Невил, проблемите за составот на Конте почнаа со продажбата на Матиќ во кого загубија многу на средината на теренот.
„Едноставно е. Минута во која решија да го продадат Матиќ е голема грешка. Кога го имате Матиќ пред вас, заедно со Канте, сте заштитени. Кој и да ја донел одлуката за трансфер во Јунајтед треба да добие отказ. Таа е една од најлошите одлуки што сум ја видел досега во Премиерлигата“, дециден е екс репрезентативецот на Англија.
По ремито со Рома во Лондон, Челзи доживеа резултатски дебакл во Рим. Два гола за „волчицата“ постигна Стефан ел Шарави, третиот беше дело на Диего Пероти за прв пораз на еден од петте англиски претставници во групната фаза во ЛШ во тековната сезона.
„Доколку прашате било кој од играчите на Челзи кого би сакале назад, ќе речат Матиќ. Челзи се обиде да ја пополни празнината со Бакајоко, но тој не е ист тип на фудбалер. Тие не го заменија Матиќ. Да бев на нивно место ќе го врзев со ланци за зградата“, коментира Невил.
Челзи веќе во недела попладне го очекува дерби со Манчестер јунајтед на „Стемфорд бриџ“.