Андреа Пирло ја завршува богатата фудбалска кариера. Легендарниот Италијанец го имаше последниот настап за Њујорк сити против Колумбус во четврт-финалето на источната конференција во американската МЛС лига. Во игра влезе во судиското надополнување на средбата пришто беше поздравен со овации од трибините. Неговата екипа на крајот забележа пирова победа со 2:0, но остана без полуфинале поради поразот со 1:4 во воведните 90 минути од двомечот.
За време на дводецениската кариера, Пирло прерасна во еден од најдобрите светски играчи за врска. Го понесе прекарот „Моцарт“ како најсоодветен одраз на неговата перцепција, креативност и вештини како член на екипите на Бреша, на Реџина, на Интер, на Минал, на Јувентус и на Њујорк сити.
Најголемите успеси ги постигна со „росонерите“ од Милано за кои настапуваше од 2001 година до 2011 година, период во кој даде фолем придонес за двете титули во Лигата на шампиони и по една во Серија А, во УЕФА Суперкупот и на Светското клупско првенство.
За репрезентацијата на Италија одигра 116 натпревари и беше дел од генерацијата што ја освои шампионската титула на мундијалот во Германија во 2006 година. Со оглед дека наредниот месец му истекува договорот со клубот во САД, се шпекулира дека нема да потпише нов, дека наскоро ќе објави крај на кариерата. Во фудбалските кулоари се врзува со Челзи, но не како фудбалер туку како асистент во стручниот штаб на Антонио Конте.