Без разлика дали во понеделник ќе се добие подобрена понуда од Енекод или ќе се отвори било каква постапка во Фени, таа ќе заврши со активно реструктуирање на компанијата и со понатмошна нејзина деловна активност за најдоцна 1,5 до два месеца, изјави денеска вицепремиерот за економски прашања Кочо Анѓушев.
– Се очекува до понеделник Енекод да даде подобрена понуда кон банките, но и доколку тоа не се случи повторно сум оптимист дека и преку судска постапка ќе настане реактивирање на Фени за месец и половина до два. За компанијата има повеќе заинтересирани инвеститори, а погодува и цената на фероникелот која во моментов расте, рече Анѓушев и додаде дека е сигурен от Фени ќе заврши со рестартирање.
Нагласи дека преговорите меѓу Енекод и банките се надвор од ингеренциите на Владата, но додаде дека процесот се следи.
На 31 октовмри Основниот суд Велес отвори претходна постапка за испитување на условите за отворање на стечајна постапка за Фени индустри од Кавадарци. За времен стечаен управник е назначен Мирослав Атанасиевски од Гостивар, а првото рочиште е закажано за 13 ноември во Основен суд Велес.
Околу 850 работници на „Фени“ вечра го блокираа магистралниот Градско-Прилеп со барање неколкуте банки доверители да се повлечат и компанијата да не оди во стечај.
Привремениот стечаен управник Мирослав Анастасиевски изјави дека Фени Индустри АД има добар бизнис потенцијал, а отворање на стечајна постапка во овој момент е единствен начин за зачувување на имотот, спречување на настанување на штети и изнаоѓање на најбрзо можно решение за рестартирање и ангажирање на вработените во одржување на технолошкиот минимум, со изнаоѓање на нов стратешки инвеститор и брз премин кон нормално функционирање.