Посредникот на ОН во спорот за името Метју Нимиц на средбата со претставниците на Грција Адамантиос Василакис и на Македонија Васко Наумовски закажана на 20 и 21 ноември во Њујорк ќе излезе со конкретен предлог за решавање на спорот, јавуваат грчките медиуми, пренесува МИА.
Атина очекува по победата на премиерот Зоран Заев на локалните избори и стабилизацијата на неговата Влада, од Македонија да продолжи со активностите на „добра волја“ со кои ќе покаже дека го напушта иредентизмот, како што се промената на името на Аеродромот во Скопје и отстранување на спомениците поставени во времето на Никола Груевски, објавуваат Радио Атина 9.84, Реал.гр и Иефимерида.
Грчките медиуми пренесуваат дека вицепремиерот Кочо Анѓушев вчера во обраќање на дебата во Џон Хопкинс институтот во Вашингтон побарал од САД поддршка за решавањето на спорот за името.
Претходно весникот Катимерини објави дека следната недела во Атина ќе престојува вицепремиерот за европски прашања Бујар Османи.
Повикувајќи се на аналитичари, весникот информира дека се очекува средбите меѓу претставници на двете земји да се интензивираат на почетокот од следната година.
Не прецизирајќи дали посетата на Османи е во рамките на напорите за решавање на прашањето за името, или во врска со другите аспекти од билатералните односи меѓу Македонија и Грција, весникот во истиот текст се осврнува на средбата со медијаторот Метју Нимиц која за наредната недела ја најави премиерот Зоран Заев.