Врховниот суд го одби барањето на бугарската компанија „Енекод“ за изземање на Судот во Велес од постапката за проценка дали компанијата ФЕНИ треба да оди во стечај.
Судот денеска оцени дека е неоснован предлогот на ФЕНИ индустри АД Кавадарци за определување на друг месно надлежен суд за водење на стечајната постапка е одбиен како неоснован, со што постапката за овој предмет останува да се води пред стварно и месно надлежниот Основен суд Велес, соопшти Врховниот суд.
На 13 овој месец, „Енекод“ побара изземање на Велешкиот суд, поради што не се расправаше за случајот за отворање стечај.
Предстечајната постапка на фабриката е отворена на барање на трите најголеми доверители Комерцијална банка, Стопанска банка и Силк роуд. Комбинатот на овие три банки им должи 40 милиони евра, а вкупниот долг на фабриката е над 60 милиони евра. Предстечајната постапка беше отворена на 31 октомври, а за привремен стечаен управник беше назначен Мирослав Анастасиевски од Гостивар.
Тој тогаш изјави дека отворање стечајна постапка во овој момент е единствен начин за зачувување на имотот, спречување на настанување на штети и изнаоѓање на најбрзо можно решение за рестартирање и ангажирање на вработените во одржување на технолошкиот минимум.
Банките доверители пак рекоа дека барањето за изземање на судот е сосема неосновано и дека го сметаат за уште еден обид на сопствениците и нивните новоназначени претставници за оддолговлекување на постапката за реорганизација и премин на „Фени“ кон нормално функционирање и целосно работно ангажирање на вработените.