Пакистанската полиција, засилена со елитни армиски единици, употреби солзавец и водени топови за да ги разбие демонстрантите во главниот град Исламабад, додека протести се шират и во другите поголеми градови во државата.
Според неофицијални информации, во судирите со полицијата повредени се 50 луѓе.
Причина за протестот е промената на изборниот закон и молитвата која секој избран политичар ќе мора да ја даде, која е неприфатлива за исламистичките партии во Пакистан.
Во Исламабад судирот се случил на сообраќајната клучка Фајзабад која изминатите две недели беше блокирана од страна на демонстранти поврзани со муслиманското движење Техрик и Лабаик Ја Расул Алах.
Демонстрантите одбија да се повлечат од сообраќајницата по неколкуте добиени судски одлуки дека нивниот протест е нелегален. Неколку илјади луѓе учествувале во протестите, а повеќемина од водачите на организацијата биле обвинети за организирање безредија и напади врз полицијата.
Утрово, полицијата му нареди на водачот на движењето, Кадим Хусеин Ризви, да се предаде и да им нареди на своите следбеници да се разотидат. Ризви тоа го одбил, а неговите следбеници, вооружени со стапови и камења најавија дека ќе го бранат Ризви од полицијата. Околу 8.500 полициски и армиски припадници интервенираа за разбивање на демонстрантите.
Набрзо по веста за полициската интервенција против следбениците на Ризви, протестите се прошириле во најголемиот пакистански град Карачи, каде демонстрантите исто така блокираа важни сообраќајници, но засега нема полцииска интервенција, јави весникот Дон. Протести се организираат и во Лахоре и други поголеми градови.