По распитот на 24 осомничени за насилствата во Собранието Кривичниот суд соопшти дека 30-дневен притвор им е одреден на 13 лица. Меѓу нив е поранешниот директор на БЈБ, Митко Чавков, оперскиот пејач Игор Дурловски, членот на Извршниот комитет на ВМРО-ДПМНЕ, Богдан Илиевски, вработен во УБК, двајца вработени во Собранието и други лица. Мерка домашен притвор добија шест лица, меѓу кои и Борис Дамовски и актерот Владо Јовановски.
За притворот на петмината пратеници ќе одлучува Собранието.
Во предметот на Јавното обвинителство опфатени се вкупно 36 лица, од кои во судот се донесени на распит 24 лица.
Во продолжение соопштението од Основниот суд Скопје 1 што предмалку беше испратено до јавноста.
Постапувајќи по предлог на ОЈО за организиран криминал и корупција за определување мерка притвор, пред судија на претходна постапка при Основниот суд Скопје 1 – Скопје во текот на вчерашниот ден беа спроведени 24 лица…
Постапувајќи по предлог на ОЈО за организиран криминал и корупција за определување мерка притвор, пред судија на претходна постапка при Основниот суд Скопје 1 – Скопје во текот на вчерашниот ден беа спроведени 24 лица, за кои по нивно произнесување во однос на предлогот на обвинителството, донесени се решенија со кои на лицата :
М.Ч., О.П., И.Д., М.П., О.Р., Г.А., В.Т., Д.Л., И.Ц., Б.И., Ј.Ч., И.С., и В.М. судијата на претходна постапка го прифати предлогот и им определи мерка притвор во траење од 30 дена, додека на:
С.М., Г.Ѓ., М.П., Е.Д.Б., Б.Д., В.Ј, им определи мерка куќен притвор.
Против овие неправосилни решенија, странките имаат право на жалба до Кривичниот совет на овој суд во рок од 24 часа по приемот на решенијата.
За лицата кои се опфатени во предлогот, а во моментот извршуваат функција Пратеник во Собрание на Р.М., судијата на претходна постапка ќе пристапи кон одлучување по предлогот на обвинителството откако ќе биде одлучено по барањето на судот испратено до Претседателот на Собранието на Р.М., додека за останатите лица кои се опфатени во предлогот, а не беа спроведени пред судијата на претходна постапка, судот сеуште нема добиено известие за причините поради кои не е постапено по наредбите за нивно приведување.