Лестер Бо Мекејлеб ја менува клупската средина, но не и кошаркарската сцена. Членот на генерацијата на македонски репрезентативци кои го освоија четвртото место на ЕП 2011 во Литванија ја продолжува кариерата во шпанската АЦБ лига во тимот на Сарагоса со кој се обврза на верност до крајот на сезоната.
Мекејлеб во сезоната 2016/17 го носеше дресот на Гран Канарија и по нејзиното завршување беше без ангажман по ставот на клупското раководство да не понуди обновување на соработката. Претходно настапуваше за Лимож (2016 година), за Баерн Минхен (2015-2016), за Фенербахче (2012-2014), за Монтепаски Сиена (2010-2012), за Партизан (2009-2010) и за Мерсин (2008-2009).
За Македонија на ЕП 2011 постигна вкупно 235 коша и се најде во најдобриот тим на шампионатот со просек од 21,4 поени, 3,1 скок и 3,7 асистенции по натпревар. Турнирот во Литванија го заврши како втор најдобар стрелец зад францускиот репрезентативец, Тони Паркер.