Партијата ВМРО-ДПМНЕ, соопштува дека согласно објавените заложби на новиот претседател на партијата, Христијан Мицкоски, започнува процес за измена на статутот на ВМРО-ДПМНЕ со цел зацврстување на партиските органи, нивната независност и дополнителна демократизација на партијата.
„Статутарната комисија започнува постапка за измена и дополнување на Статутот на ВМРО-ДПМНЕ. Врз основа на фактот што внатрепартиската иницијатива за реформи во текот на месец јуни 2017 година има доставено до Централниот комитет на ВМРО-ДПМНЕ предлог Декларација за демократизација и модернизација на ВМРО-ДПМНЕ и предлог измени на Статутот на ВМРО-ДПМНЕ, ги повикуваме со свои претставници да земат учество во работата на Статутарната комисија, со цел усогласување на ставовите за предметните измени“, се вели во соопштението на ВМРО-ДПМНЕ.
Најголемата опозициска партија во моментов, ги повикува сите свои членови да учествуваат во процесот на демократизација на Статутот на ВМРО-ДПМНЕ и со свои предлози да се обратат до Статутарната комисија на ВМРО-ДПМНЕ.
„Целта на ваквата постапка е постигнување на поголема ефикасност на делувањето на органите на партијата, зајакнување на партиските органи, и поголема независност во донесувањето на одлуките од страна на истите. Секоја промена ќе биде направена низ процес на отворен внатрепартиски дијалог и консултација, како и користење на позитивните искуства на демократските десничарски сестрински партии од Европа“, се вели во соопштението на ВМРО-ДПМНЕ.