Михаела Шифрин и Марсел Хиршер се победници во денешните трки во Светскиот куп во алпско скијање во обете конкуренции.
Американката Шифрин триумфира во велеслаломот во Крањска Гора со време од 1:47,40 минути што значеше и црвена маичка наменета за најдобрата скијачка во дисциплината. Второ време имаше Теса Ворли од Франција (+31 стотинка), а трета беше Италијанката Софија Гоџа (+91 стотинка).
Благодарение на осмата победа во сезоната, Шифрин е водечка во велеслалом со 385 бода пред Ворли со 330 и Германката Викторија Ребенсбург со 322. Шифрин е на лидерската позиција и во генералниот пласман во Светскиот куп со 1.181 бод пред Ребенсбург со 534 бода и Петра Влхова од Словачка со 504 бода.
Марсел Хиршер, пак, беше доминантен на познатата стрмнина во швајцарски Аделбоден каде најдобрите скијачи на денешницата се натпреваруваа во велеслалом. Австриецот оствари резултат од 2:28:63 минути за 51 победа во кариерата. Второто место го освои Хенрик Кристофрсен од Норвешка (+17 стотинки), трет беше Французинот Алексис Пинтуро (+21 стотинка).
Хиршер води во генералниот пласман во Светскиот куп со 774 бода. Зад него се Кристоферсен со 660 бода и Пинтуро со 502.