По одлуката на Апелациониот суд, осомничените за насилните протести во Собранието на 27. април да останат во притвор, од ВМРО-ДПМНЕ сметаат дека институциите уште еднаш паднале на тестот за владеење на правото.
„Судот со одлуката да ги отфрли жалбите за ослободување од притвор на патриотите кои ја бранеа оваа држава уште еднаш потврди дека ги подржува катастрофалните политики кои водат кон се поголем раздор и продлабочување на кризата. Институциите не покажаа минимум зрелост да работат за граѓаните, како што тоа им е наложено согласно закон и Устав. Уметниците, пратениците, полициските службеници и останатите притворени во врска со настаните од 27 април не се терористи!“, пишува во реакцијата од ВМРО-ДПМНЕ.
Според оваа партија, тие не сториле никаков терористички акт и се жртви на политички прогон само заради тоа што имале храброст гласно да го искажат своето несогласување со антидржавните политики на власта.
„Политичкиот прогон и малтретирањето на овие луѓе мора да запрат. Бруталното замолкнување и заплашување на сите кои не се согласуваат со антидржавните политики на актуелната власт ќе има контраефект и ќе го зголеми револтот“, велат од ВМРО-ДПМНЕ.