Три ракети биле истрелани вчера од територијата на Сирија кон граничната турска провинција Килис, откако Турција ја започна воената акција во регионот Африн.
Операцијата е против курдските формации од „Силите за заштита на народот“ и „Партијата на демократскиот сојуз“ во реонот Африн во Сирија, каде што живеат околу 1,5 милиони сириски Курди.
Анкара ги смета овие групи за поврзани со Курдската работничка партија (ПКК), која во Турција е прогласена за терористичка организација.
Турската армија соопшти дека во воздушните напади во Сирија погодени биле 108 мети на сириските Курди.
Турските медиуми утрово објавија дека тенкови и други оклопни возила веќе ја преминуваат границата со Сирија. Граничниот премин Ончупинар, кој се наоѓа во сирискиот град Азаз, е под турска контрола.
Курдските Единици за заштита на народот соопшти дека во воздушните напади врз провинцијата Африн загинале тројца борци и шест цивили. Во нападите на турската армија повредени биле и 13 цивили.
Претходно, сириската Влада ги осуди турските воздушни напади и тврди дека Анкара не го известила Дамаск за воената операција.