Во Кривичниот суд денеска е закажано судење за предметот на СЈО „Тарифа“, во кој се обвинети поранешниот генерален директор на АД „ЕЛЕМ“ Дејан Бошковски и уште други две лица.
Станува збор за обвинение за противзаконска набавка на софтверски систем за потребите на државната компанија „Електрани на Македонија“ вреден околу четири милиони евра.
Обвинителите на СЈО на минатото рочиште во Судот рекоа дека ќе докажат оти тројцата обвинети ја злоупотребиле службената положба и овластувањето. Обвинетите пак се изјаснија дека не се виновни.
Според обвинението на СЈО, обвинетите ја злоупотребиле службената положба и овластувањето во постапка за јавна набавка на софтвер – „ЕРП систем“. Обвинетите со неизвршување на службената должност овозможиле правното лице – конзорциум, кое подоцна го добило тендерот, да се квалификува во втората фаза на преговарање при јавната набавка, иако немало доставено комплетна документација.
Бошковски беше на чело на ЕЛЕМ од октомври 2012 година. Тој дојде на местото на Влатко Чинковски откако надзорниот одбор ја прифати неговата оставка. Набавката, според Бошковски, била потпишана пред да ја преземе функцијата.
Обвинението на СЈО, пак, го товари Бошковски и уште две лица, за злоупотреба на службената положба затоа што му овозможиле на конзорциум да се квалификува во втората фаза од тендерската постапка иако немал комплетна документација.
Софтверот, кој е предмет на обвинението и кој чинел четири милиони евра, се уште не е имплементиран.
Во декември лани, СЈО го прошири обвинението со уште една истрага под кодното име „Тарифа 2“. Во оваа истрага е осомничен третообвинетиот Ненад Ѓорѓевиќ, затоа што одобрил исплата на средства во висина од 218.000 евра на чешка компанија од конзорциумот иако работата не била завршена.
Бошковски е инаку сопруг на Билјана Бришкоска Бошковска, поранешен заменик министер за правда.
Со новиот распоред предметот „Тарифа“ ќе го суди судијката Софче Гаврилова-Ефремова.
Тврдина, Таргет, насилствата во општина Центар, Транспортер, Тарфа, Тенк, Труст, Триста – вкупно 34 судски рочишта во кривичен се закажани за нивните предмети само во јануари и февруари.