Паника завладеа синоќа на Волстрит, откако главниот индекс на Њујоршката берза драстично се намали по повеќемесечна берзанска еуфорија.
Дoу Џонс Индастријал Авериџ, индустрискиот индекс на САД, нагло падна во вториот дел од денот и во помалку од еден час ги премина праговите од 500, 1.000 и 1.500 загубени бодови. Ова е најголем дневен пад од светската финансиска криза во 2008 година. Сега е на најниско ниво, со пад поголем од 10 отсто во однос на последниот рекорд регистриран на 26 јануари. По подоцнежното опоравување, пред крајот на денот Доу Џонс падна за околу 4,60 отсто.
Технолошкиот индекс Насдак загуби 3,78 отсто, додека S&P 500 во кој се 500 најголеми компании на берзите во САД, 4,10 отсто.
Ова се случува во момент кога Џером Пауел ја презема должносат гувернер на американската Централна банка, каде досега беше шеф Џенет Јелен, единствена жена на таа функција. Белата куќа синоќа објави дека „секогаш е загрижена кога вредноста на берзите паѓа“.
Портпаролот подоцна изјави дека се работи за „краткорична флуктуација на пазарите“ и доддаде дека американската економија и понатаму е „многу силна“ и „оди во добра насока“.
– Американскиот претседател Доналд Трамп се занимава со „основите“ на долгорочната економија, која и натаму е „исклучително силна“, соопшти Белата куќа по паниката поради падот на индексот на Волстрит.
– Претседателот се фокусира на нашите долгорочни економски основи, кои се исклучително силни, со јакнење на економскиот раст, историски ниската стапка на невработеност и раст на заработувачката на американските работници, изјави портпаролката на Белата куќа Сара Сандерс.
Си-Ен-Ен нагласува дека „со години на Волстрит немало толку страшен ден“ и оти акциите биле во „слободен“ пад. Стапката на невработеност во САД моментно е на најниско ниво во изминатите 17 години.
Нема простор за паника
Во САД засега се прават првични анализи кои велат дека останатите сегменти на економијата се во здрава кондиција па така се уште нема простор за паника и црни прогнози како тие во 2008 година, односно дека платите се стабилни, личната потрошувачка постојано се подобрува, а истото важи и за инвестициите, па така најверојатно се работи за привремено „топење“ на берзите.
Американскиот претседател Доналд Трамп во изминатите месеци постојано го фалеше пазарот на акции и колку многу скокнала вредноста откако тој победи на изборите ветувајќи фантастична 2018 година, но сега кога индексите почнаа да паѓаат и економијата е доведена во ризик него никаде го нема да искоментира на Твитер и да ја презеде одговорноста.
Според проценките на американските аналитичари пакетот на даночни реформи кој го донесе администрацијата на Трамп своите поволности ќе ги даде кон крајот на оваа и почетокот на следната година, додека пак за 2020 предвидуваат мала рецесија на американската економија.
Последиците ги почувствува и Азија
Негативните последици на Вол Стрит се пренесоа и во Азија каде исто така пазарите на капатал трпат загуби и пад на вредноста на акциите.
Јапонскиот берзански индекс Никеи 255 падна за 7.1 проценти со 21,087.71 индексни поени, Ханг Шенг индексот на берзата од Хонг Конг падна 5%, австралискиот берзански индекс S&P ASX 200 падна за 3,4%, индексот Kospi од Јужна Кореја бележи пад од 2,4%, а најмал пад има кај Shanghai Composite index за 2,2 %.