Собранието на Република Македонија и оваа недела нема да одржи пленарна седница, а не се закажани ниту седници на комисиите. Ова ќе биде втора недела како Парламентот нема да одржи седница. Има и незавршени седници, а има и прашања и закони кои се очекува да бидат ставени за дневен ред на некоја следна седница.
На веќе започнатите седници се прашањата за Законот за јазиците, за кој има поднесено над 35.000 амандмани од страна на ВМРО-ДПМНЕ, законите за патните трошоци, прашањето за потпретседателите на Парламентот, но и барањето за ставање на дневен ред на одлука за пополнување на составот на Државната изборна комисија.
Минатата недела од кабинетот на претседателот на Парламентот Талат Џафери информира дека амандманите се предведени и оти тие сега технички се средуваат и се групираат, но оти се уште не се знае кога ќе се расправа за нив. Аманданите се на дневен ред на 32. седница како осма точка, но таа беше прескокната со образложение дека не се создадени технички услови за да се расправа за нив.
На оваа седница на дневен ред се и измените на законите со кои се намалуваат патните трошоци на пратениците и на другите избрани и именувани лица, законот за минерални суровини, по скратена постапка, како и други финансиски планови, одлуки и извештаи.
За амандманите за Законот за јазиците власта се надева дека ќе биде постигнат некаков политички договор со опозициската ВМРО-ДПМНЕ. Сепак, политичарите не откриваат како ќе биде постигнат овој договор.
Поголема група пратеници меѓу кои и претседателот на Парламентот Талат Џафери, како и вработени во службата на Собранието во вторник заминуваат во Вилтон Парк, во Велика Британија, каде македонскиот Парламент има повеќегодишна соработка со тамошниот институт. Партиска делегација претходно беше во Стразбур во Европскиот парламент, а исто така неколку пратеници беа и на молитвениот појадок во Вашингтон.
Но, минатата недела во Парламентот се состануваа работните групи составени од пратеници од власта и опозицијата, на кои се разговарало за реформските закони. Дека вакви средби се одржале, потврдуваат од партиите, но нема информации дали нешто е усогласено.