Адвокатите на поранешната министерка за култура, Елизабета Канческа Милевска, на денешното рочиште за случајот „Тендери“, побараа да се провери дали СЈО има надлежност над овој случај и да се изземе вештачењето за тендерите испишано на околу 700 страни, што пак е клучен доказ на СЈО.
Според одбраната, вештачењето е направено од фирма која е подружница во Скопје на фирма од Италија која немала документ за регистрација и правен статус во Македонија.
Адвокатите на Канческа Милевска тврдат и дека во моментот кога е потпишано вештачењето, експертите биле со истечена лиценца.
За ова, обвинителите тврдат дека лиценцата се продолжувала ретроактивно.
Судот на наредното рочиште ќе се произнесе за нивните барања, по што конечно треба да започне расправата. Судењето ќе продолжи на 13 март.
Обвинетите во „Тендери“ се товарат за злоупотреба на службената положба и овластувања односно дека ја фаворизирале фирмата ГТД Бетод Штип – АД Штип да добие тендер за изведување на завршни градежни работи на објектот Музеј на македонската борба за државност и самостојност – Музеј на ВМРО.