Претседателот на Собранието Талат Џафери за денеска во 13 часот ја закажа седницата за Законот за јазици.
Тој на вчерашната координација сепак не соопштил како ќе ја води седницата и дали ќе ги стави амандманите на гласање.
Дел од присутните на состанокот, за НОВА брифираат дека се очекува Џафери да ги отфрли сите амандмани, со образложение дека со нив се бара да се оцени уставноста на Законот, што не е во надлежност на пратениците. Оние кои сметаат дека Законот е неуставен ќе бидат упатени да поднесат претставка до Уставниот суд.
Од парламентарното мнозинство очекуваат и ВМРО ДПМНЕ да гласа за Законот.
Артан Груби од ДУИ за НОВА изјави дека ВМРО ДПМНЕ има шанса утре да го покаже своето ново лице, гласајќи за Закон за кои и тие се коавтори исто како ДУИ и СДСМ.
Седницата за Законот за јазици требаше да се одржи минатиот вторник, но тој обид пропадна поради тоа што ДУИ и СДСМ не постигнаа договор дали да се отвори расправа за амандманите поднесени од ВМРО ДПМНЕ.
Премиерот Зоран Заев вчера рече неделава се очекува да биде донесен законот за употреба на јазиците, а по девет месеци расправата треба да биде завршена.
„ Порано овие закони се носеа по самото завршување на парламентарните избори, сега дадовме девет месеци дебата. Сите кажаа сè што имаа да кажат. Нека се донесе законот, нека се спроведе и ќе видиме сите дека не било ништо толку тешко и трагично, туку ќе овозможи полeсно да се разбираме едни со други, изјави Заев.
Од ВМРО ДПМНЕ најавија дека ќе присуствуваат на седницата и дека нема да ги повлечат амандманите. Опозицијата има поднесено 35.569 амандмани.
Лидерот Христијан Мицкоски вчера од Конче оцени дека законот за јазиците има за цел да атакува врз соживотот, и како пример наведува дека тој на собраниска седница се става, како што вели, токму на денот кога почна воениот конфликт во Тетово.
Мицкоски во неколкуте вчерашни изјави само потврди дека ќе присуствуваат на седницата, но рече дека дополнително ќе донесат одлука.