Москва вети дека брзо ќе одговори на протерувањето на 23. дипломати од Велика Британија.
Конечната одлука ќе ја донесе претседателот Владимир Путин и тоа не за долго, изјави неговиот портпарол.
Руското Министерство за надворешни работи на својата интернет страница вчера објави реакција во која се вели дека „британската Влада се одлучи за конфронтација со Русија со тоа што донесе одлука да не дејствува согласно воспоставените меѓународни формати во случајот на поранешниот полковник од ГРУ (воена разузнавачка служба) Сергеј Скрипал“.
-Наместо да спроведе сопствена истрага, да ги активира воспоставените меѓународни формати и инструменти, вклучително и во рамките на Организацијата за забрана на хемиско оружје, за што бевме подготвени, британската влада направи избор во корист на конфронтацијата со Русија, се вели во соопштението на руското МНР.
За ова прашање говорел и рускиот министер за надворешни работи, Сергеј Лавров, но извештаите на руските медиуми за она што тој го кажал се спротивставени.
Агенцијата РИА Новости ја цитираше изјавата дека Русија “дефинитивно” ќе ги протера британските дипломати “наскоро”.
Но, другите медиуми, повикувајќи се на истата изјава објавија дека Русија прво ќе ги информира британските власти пред одлуката д абиде објавена јавно.
Тас, цитирајќи го Лавров објави дека тој изјавил дека се надева на брзо опоравување на Скрипал, за да може да ги расветли настаните.
Во четвртокот лидерите на Франција, Германија, САД и Велика Британија издадоа заедничка изјава за нападот, осудувајќи ја “првата злоупотреба на нервен агенс во Европа од Втората светска војна наваму”.
Џонсон за Би-Би-Си
Денеска, британскиот министер за надворешни работи Борис Џонсон во изјава за Би-Би-Си изјави дека Русија го нападнала поранешниот двоен агент Сергеј Скрипал со нервен агенс, со цел јасно да покаже дека оние кои и пркосат на Москва, ќе бидат казнети.
– Причината поради која го одбраа овој нервен агенс е да посочат дека во прашање е Русија и да им покажат на луѓето во нивните агенции кои можеби би помислеле да ги напуштат, да се решат за друг начин на живот или да веруваат во друг систем на вредности, дека Русија на крајот ќе им се одмазди, изјави Џонсон.
Според него, ваквиот став на Русија се согледува и во „гордиот и саркастичен одговор“ на Москва по нападот врз Скрипал и неговата ќерка.
– Русите сакаат да реагираат симултано, а во исто време и да слават, заклучи Џонсон.
Тој најави дека „корумпираните Руси“, кои се збогатиле благодарение на врските со рускиот претседател Владимир Путин, би можеле да бидат цел на британската полиција, како одговор на нападот врз Скрипал.
– Луѓето сакаат да го видат дека некој од многу богатите личности кои се директно поврзани со Владимир Путин ќе бидат принудени да објаснат како го стекнале своето богатство и ќе бидат изведени пред лицето на правдата поради нивната голема корумпираност, нагласи Џонсон за Би-Би-Си.
Британија протерува 23 руски дипломати
Како одговор на нападот со нервен агенс врз Скрипал и неговата ќерка Јулија, британската премиерка Тереза Меј вчера најави дека од Велика Британија ќе бидат протерани 23 руски дипломати.
Меј во Парламентот изјави дека руските дипломати имаат една недела да ја напуштат Велика Британија, што е најголемо протерување на дипломатски претставници од периодот на Студената војна.
Британската премиерка смета дека Русија покажала презир кон желбата на Велика Британија да се објасни обидот за убиство на Скрипал и неговата ќерка. – Активностите на Русија претставуваат незаконска употреба на сила, истакна Меј.
Таа најави и повеќе економски и дипломатски мерки, вклучувајќи го и откажувањето на билатералните контакти на високо ниво со Русија и оти ќе побара од кралското семејство да не присуствува на Светското фудбалско првенство, што ќе се одржи во Русија.
Сергеј Скрипал, кој е пораншен полковник во руската воена разузнавачка служба ГРУ, и неговата ќерка Јулија минатата недела беа најдени во критична состојба на клупа во градски парк во англискиот град Солсбери. Тие сега се в болница и се наоѓаат во кома, додека лекарите се борат за нивните животи. Се претпоставува дека тие се жртви на напад со употреба на нервно парализирачки гас.
Жртви на гасот беа уште 19 други лица и сите тие, освен еден полицацец кој истражувал на местото на настанот, се пуштени на домашно лекување.