Во затворот Шутка, при претрес на притворените за инцидентите од 27 април биле пронајдени мобилни телефони и тие се предадени на вештачење, потврдија за НОВА од Обвинителството.
„Во изминатиот период во КПУ затвор – Скопје, при претрес на лицата притворени во врска со настаните во Собранието на Република Македонија, од страна на службените лица пронајдени се неколку мобилни телефони и истите се предадени на вештачење. Вештачењето на телефоните е во тек“, пишува во одговорот од Обвинителството за НОВА.
Според информации на Дојче Веле, телефонски апарати биле најдени кај пратениците Крсто Мукоски и Сашо Василевски, екс началникот во МВР, Оливер Поповски, член од обезбедувањето на Трајко Вељаноски и други лица. Според првичните сознанија, дел од притворените преку тие телефони оствариле интензивна комуникација со партиски и други лица и не го криеле гневот дека се изневерени, и додека тие се во притвор, други спокојно си седат во фотелји, објави Дојче Веле.
Адвокатите на дел од осомничените рекоа дека не се информирани за одземените мобилни телефони. Тие очекуваат Врховниот суд денеска да ги објави одлуките по жалбите на 15 обвинети за настаните во Собранието на Република Македонија од 27 април минатата година. Со жалбите се бара укинување на мерките притвор и куќен притвор и изрекување на поблаги мерки за осомничените.
За поранешниот министер за внатрешни работи Митко Чавков и пратениците Крсто Муковски и Сашо Василевски се бара укинување на мерката притвор, а за пратеникот Љупчо Димовски и оперскиот пејач Игор Дуловски укинување на мерката куќен притвор и изрекување на мерки на претпазливост.
Муковски, Василевски, Чавков, Димовски, Дуловски, Поповски и полицискиот службеник Мунир Пепиќ се дел од 35-те осомничени за терористичко загрозување на уставниот поредок и безбедноста.