Претставникот на Јавното обвинителство Анита Тополова Исајловска денеска до Врховниот суд достави предлог со кој бара влијанието врз сведоци и повторувањето на делото да не бидат земени како основа за продолжување на притворот и на куќниот притвор на дел од сомничените за насилствата во Собранието од 27 ми април, бидејќи истрагата веќе е завршена.
Сепак, обвинителката во своето обраќање пред судот наведе дека и натаму како основ за притвор останува опасноста од бегство и побара судот да ја отфрли жалбата и да им ги продолжи притворите.
Адвокатите од друга страна се согласија со предлогот на обвинителството, но во своите обраќања до судот тврдеа дека притворот треба да се укине, бидејќи опасноста од бегство е неоснована. Безмалку сите адвокати во својата аргументација се осврнаа на решението на Апелациониот суд на кое се жалат, а за кое рекоа дека е паушално па дури и незаконитио и дека е спротивно на праксата на Европскиот суд за човекови права.
Адвокатот на поранешниот министер за внатрешни работи Митко Чавков, Сашко Дукоски рече дека не може во решение на суд да не бидат образложени причините поради кои се одредува притвор со што, како што поочи, се крши начелото за презумција на невиност, а притворот станува казна без правосилна пресуда. Адвокатите посочија дека во решението судот не ги образложил околностите за секој осомничен поединечно туку донел генерална одлука за сите.
Адвокатите, но и самите осомничени кои добија можност да се обратат до судот побараа мерката притвор да им биде заменета со мерки за претпазливот или со куќен притвор, а како гаранција дел од нив ги понудија и своите пасоши. Дипломатските и личните пасоши ги остави пратеникот Сашо Василевски и Горан Ѓошески, шеф на обезбедување на поранешниот претседател на Собранието Трајко Велјановски.
Мукоски, Чавков, Василевски пред судот рекоа дека воопшто немаат намера да бегаат, туку напротив сакаат активно да учествуваат во натамошната постапка за да ја докажат својата невиност за тешкото кривично дело кое им се става на товар.
„Немам црна дамка во својата кариера. 40 години работам во МВР, од кои 20 години сум на високи позици, немам црна дамка, сум бил наградуван од сите досегашни влади. Не постојат основи на сомение за кривичното дело кое ми се става на товар. Сега сум пензионер , но со оглед на околностите ке морам да ја продолжам мојата правна борба, но во една друга постапка за докажување на мојата невиноста
Пратеникот Крсто Мукоски се пожали на лошите услови во истражниот затвор Шутка . Кажа дека сериозно му е нарушена здравствената и психичката состојба и дека доколку продолжи притворот нема да биде во можност да учествува во натамошната постапка. Тој рече дека ќе му биде потребен период на опоравување за да може да продолжи со пратеничката функција.
Се очекува Врховниот суд да ги разгледа жалбите и да донесе одлука во наредните два дена.
Одлуката ќе ја донесе Кривичниот совет на Врховниот суд со кој претседава Јово Вангеловски, а во чиј состав се и судиите Ристо Катавеновски, Шпенд Деваја, Џемаили Саити и Рахилка Стојковска.