Премиерот Зоран Заев денеска на прес-конференција изјави дека е можно покренување иницијатива пред Уставниот суд за непочитување на Уставот од страна на претседателот на државата Ѓорге Иванов поради непотпишување на Законот за јазиците.
– Се разгледуваат повеќе опции. Една од опциите која што ја разгледуваме е токму таа заради тоа што потенцијално може претседателот кога сака да ја урниса надлежноста на Парламентот на Македонија. Право е на Парламентот и секако тие ќе соопштат за деталите на одлуките што ќе ги донесат. Она што го знам од нашата пратеничка група дека една од опциите е тоа токму Уставниот суд да каже што во ваков случај, од причина што може да се случи и во следните 30 закони претседателот да одлучи да не ги потпише, па ќе мора повторно да се гласаат. И при повторното гласање Уставот е јасен. Должност на претседателот е да го потпише Законот. Ако не потпише тогаш во такви ситуации ја блокираме демократијата и сите процеси во една нормална земја, рече Заев одговорајќи на новинарски прашања.
Претседателот на државата Ѓорѓе Иванов, одби да го потпише указот за прогласување на Законот за јазици, за Законот да може да биде објавен во Службен весник.
Од ВМРО ДПМНЕ денеска рекоа дека доколку Законот се објави во Службен весник, без потпис од претседателот, тоа ќе биде нелегално.
„Секое објавување во ‘Службен весник’ на т.н закон за употреба на јазиците без претходен потпис од страна на претседателот на државата, Ѓорге Иванов, не е ни легално, ни легитимно и сноси не само политички туку и правни последици. Предупредуваме дека незаконското објавување на законот се смета за злоупотреба на службена должност и е казниво согласно со член 353 од Кривичниот закон на Република Македонија. Ова дело не застарува за година, две или три рече Орце Ѓоргиевски од ВМРО-ДПМНЕ.