Законот за употреба на јазиците е формално–правно блокиран по одлуката на претседателот Ѓорѓе Иванов да не го потпише указот за негово прогласување, иако, според Уставот тој е должен да го стори тоа. На тоа го обврзува членот 75 од Уставот во кој пишува:
„Законите се прогласуваат со указ. Указот за прогласување на законите го потпишуваат претседателот на Републиката и претседателот на Собранието. Претседателот на Републиката може да одлучи да не го потпише указот за прогласување на законот. Собранието повторно го разгледува законот и доколку го усвои со мнозинство гласови од вкупниот број пратеници, претседателот на Републиката е должен да го потпише указот. Претседателот е должен да го потпише указот, доколку според Уставот, законот се донесува со двотретинско мнозинство гласови од вкупниот број пратеници“, пишува во член 75 од Уставот.
Одлуката на Иванов да не го потпише Законот, може да предизвика и барање за негов импичмент. 
„Доколку Претседателот одлучи да не го потпише, законот не може да биде објавен, не може да биде прогласен – тоа е судбината на законот, а од друга страна Претседателот се соочува со импичмент, но за тоа се потребни две третини од гласовите на пратениците. Бидејки Собранието, во овој момент нема таков капацитет, тоа значи дека ситуацијата е блокирана. Собранието не му може ништо на Претседателот, а тој ќе остане на ставот дека не го потпишува Законот“, вели професорот Владо Поповски за НОВА.
Според информации на НОВА, една од опциите што се разгледува е Законот за јазиците да биде објавен во Службен весник со потпис од Претседателот на Собранието.
Досега, имало случаи да се објават укази со потпис само на претседателот на Собранието, единствено кога претседателот не бил во државата или во случај на смрт на шефот на државата, кога претседателот на Собранието ги презема неговите ингеренции.
Професорот Поповски не сакаше да коментира хипотетички ситуации, нагласувајќи дека во Уставот пишува дека законот треба да го потпишат Претседателот на државата и Претседателот на Собранието, но доколку се цени дека има правни недоречености, Уставниот суд е институцијата која треба да ги разреши.
Претседателот на Собранието, Талат Џафери денеска рече дека доколку претседателот Иванов не го потпише Законот, тој ќе го прекрши Уставот.
„Членот 75 од Уставот е јасен и по повторното гласање на Законот со мнозинство гласови од вкупниот број пратеници во Собранието, како што овој случај, претседателот е должен да го потпише. Во спротивно ги прекршува уставните процедури“, вели тој. 
Само неколку часа, по донесувањето на Законот за јазици во Собранието, претседателот Иванов вчера соопшти дека нема да го потпише.
„Колку што е опасно неспроведувањето на Рамковниот договор, толку е опасно и излегувањето од рамката што тој ја предвидува“, оцени претседателот Иванов.
Џафери не сакаше да ја коментира кривичната пријава што ја најавија од ВМРО ДПМНЕ за прекршување на процедурата при носењето на Законот.
Професорот Поповски вели дека пратениците, пред да гласаат за законот, требало да ги разгледаат забелешките од шефот на државата и да донесат заклучок дали ги прифаќаат или не. Собранието може да не ги усвои забелешките, но ако се согласи да прифати дел од нив, треба да следува амандманска дебата.
И дел од невладините организации реагираа на начинот на кој беше донесен Законот за јазици. Според Институтот за демократија „Социетас цивилис“, беше прекршена процедурата при носењето на законот, најпрво со ставањето на европското знаменце на Законот, иако воопшто не станува збор за директива која ја бара Европската Унија. Со ова беше скратено времето за дебата околу амандманите. Немаше јавна дебата, а Законот се донесе без да се слушне ставот од Венецијанската комисија.
Според вицепремиерот Бујар Османи, процедурата не била прекршена.
„Усвоени закони можат да се променат само со предлог-закони. Ако некој сака да го промени овој закон, тогаш треба да поднесе предлог за измени. Македонија заврши едно важно поглавје од својата историја и денеска повеќе од кога било е унифицирана, унисона и заедничка во своите предизвици за чекорење кон ЕУ и НАТО“, рече Османи.
Законот за јазици вчера беше донесен во тензична атмосфера, на раб на физичка пресметка меѓу Груевски и Џафери. За Законот гласаа 64 пратеници.