Најблиските соработници на грчкиот премиер Алексис Ципрас размислуваат евентуалниот договор за името во грчкиот Парламент да се верификува со 180 пратеници,пренесоа грчките медиуми.
Информативните портали In и Eurotoday објавија дека во кабинетот на Ципрас се води дебата за тоа договорот да пристигне во Парламентот,но да биде усвоен од 180 пратеници. За еден закон или одлука да се изгласаат во грчкиот парламент се потребни 151 глас.
„Доколку постои договор за името со ПЈРМ,соработниците на премиерот разговараат за тоа договорот да го достават за гласање во Парламентот и да се одобри,но не со обично мнозинство. Дискусијата сега што се води е во насока да се побара зголемено мнозинство од 180 пратеници. Ова е поради фактот дека станува збор за меѓународен договор и не треба да биде усвоен само со обично мнозинство“ напиша порталот In, а пренесува МИА.
Со слична анализа е и Eurotoday. „Никаква уставна одредба не го обврзува грчкиот премиер да ја постави границата на 180 пратеници,но решавањето на едно национално прашање,не треба се усвои само со обично мнозинство“, пишува порталот Eurotoday.
Грчкиот Парламент брои 300 пратеници, од кои 154 се дел од владиното мнозинство на СИРИЗА и Независни Грци.
Доколку се потврдат написите во медиумите и грчкиот премиер побара 180 позитивни гласови, останува отворено прашањето дали евентуалниот договор за името, би бил изгласан од Парламентот, со оглед на тоа дека Независни Грци и Сојуз на централисти се против име со вклучен терминот Македонија, додека пак, Нова демократија, Река и Демократска алијанса, засега не кажуваат како би гласале, но упатуваат критики до владата за начинот на кој ги води преговорите за името, јави дописничката на МИА од Грција.
Грчкиот министер за надворешни работи Коѕијас изминатите денови ги извести сите релевантни партии во Грција за преговорите за името и за последната рунда разговори во Виена.