На денешното рочиште за случајот „Тендери“, во кој обвинета е екс министерката за култура, Елизабета Канческа-Милевска требаше да се слушаат бомбите кои СЈО ги предложи како доказ, но адвокатите на Канческа побараа „бомбите“ да се слушаат без присуство на јавноста, заради како што рекоа, заштита на приватниот живот на обвинетите и на други лица, кои се дел од разговорите.
Обвинителите од СЈО пак, сметаат дека приватниот интерес на обвинетите не може да биде пред јавниот интерес, бидејќи, како што рече обвинителот Стевче Донев, во овие разговори не се зборува за приватноста на обвинетите туку ќе се слушне како поранешни министри зборуваат за тендери, за плаќање на државни пари, па така граѓаните треба да знаат како министрите постапувале.
Според адвокатот на одбраната Сашко Дуковски, во разговорите има лична комуникација со обраќања со лични епитети, односно постоеле навредливи квалификации на обвинетите кон сведокот.
Поранешната министерка за култура Елизабета Канческа – Милевска е првообвинета во случајот „Тендери“, кој се однесува на изведување градежни работи на Музејот на македонската борба за државност и самостојност во Скопје.