Published: Sunday, May 27, 2018 20:44
Екипата на Монпелје е нов европски ракометен шампион, откако во финалето го победи Нант со 32:26 (16:13).
Францускиот тим на патот до трофејот ги елиминираше Барселона, Фленсбург, ланскиот шампион Вардар и Нант и сосема заслужено се радуваа на успехoт. Монпелје ја освојува европската титула првпат по 2003 година.
Нашиот Кире Лазаров беше најефикасен во Нант со шест постигнати голови, но сепак не успеа да го доведе својот тим до ново изненадување и да стигне до својата втора европска круна во кариерата. За него ова беше четврто финале во Лигата на шампионите и трет пораз.
Со денешните погодоци, капитенот на Mакедонија сега има вкупно 65 на Ф4 турнирите, со што е убедливо прв на таа листа.
Во победничкиот тим Симонет реализира шест пати и беше прогласен за МВП на Ф4, додека Жерар запиша 11 одбрани на голот.
Ракометарите на Вардар претходно го загубија мечот за третото место на Ф4 турнирот во Келн против ПСЖ со 29-28 (14-15).
„Црвено-црните“ беа подобриот тим и имаа водство во поголем дел од дуелот, одиграа подобро од вчера против Монпелје, но сепак потклекнаа на крајот и го завршија турнирот со два порази за два дена.
Во најголем дел од средбата, вардарци имаа водство, но откако Французите поведоа со 24:23 до крајот ја имаа иницијативата и го задржаа водството.
Лука Циндриќ беше најефикасен кај Вардар со седум гола, Македа постигна шест, а Страхиња Милиќ имаше девет интервенции.
Прв стрелец на мечот беше Недим Ремили од ПСЖ со девет гола.
„Црвено-црните“ загубија на двете средби на сличен начин како што лани триумфираа, во последните моменти.
Капитенот на Вардар, Стојанче Стоилов призна дека одиграл подобро во завршницата на натпреварот.
– Таков е спортот, некогаш победуваш некогаш губиш. Ние сега загубивме на сличен начин како што лани победивме. Игравме добро сега, имавме и водство во најголем дел од натпреварот, но ПСЖ во завршницата беше подобар. Им честитам, изјави Стоилов на прес-конференцијата по натпреварот.