Германецот Хурберт Вирт, страствен навивач на својата фудбалска репрезентација, на несекојдневен начин отпатува на Светското првенство во Русија. Делницата долга 2.400 километри ја возеше 30 дена со трактор, а кога го прашаа за изборот на превозното средство тој одговори:
„Едноставно е. Тоа е мое хоби“, рече Вирт.
Тракторот беше украсен со германски и со руски знамиња додека на приколката стоеше натпис „Поздрав Москва“. На патешествието тргна од неговиот роден град Нојхаузен на југот на Германија и до Москва возеше со просечна брзина од 20 километри на час.
„Извонредно се чувствувам“, изјави Вирт додека се симнуваше од тракторот со своето куче на паркингот пред стадионот „Лужники“ во Москва.
Вирт не се пожали на замор. Напротив. Истакна дека уживал во едномесечното патување што го опиша како преубаво доживување пришто како највпечатливи ги истакна средбите со луѓето. Но, немаше среќа да поздрави победа на „панцирите“ кои во воведниот меч на шампионатот загубија од Мексико со 0:1.