Претставниците на граѓаните кои протестираа пред Собранието денеска имале средба со него со претседателот на ВМРО ДПМНЕ Христијан Мицкоски. Како што изјавија, сердбата била пред седиштето на партијата, при што тој им напоменал дека ги поддржува нивните протести, но пратениците од партијата нема да им се приклучат на улиците, туку ќе дејствуваат од Собранието.
Претседателот на Здружението „Семакедонски национален совет Македониум“ Страшо Олумчев, по средбата, за МИА изјави дека по нивното барање за напуштање на пратениците од опозицијата на седниците во Собранието и да се приклучат на протестите, Мицкоски им кажал дека ВМРО-ДПМНЕ нема да го напушти Собранието, но и дека нема да учествува во собраниските активности поврзани со договорот со Грција, бидејќи, како што смета, би било подобро партијата да бдие внатре и да го спречи премиерот Зоран Заев во носење штетни одлуки.
Олумчев рече дека разговарале и за референдумот за кој Мицкоски во медиумите дал изјава дека ќе гласа против, а од Здружението му посочиле дека треба да се спречи тој референдум со образложение дека името на Македонија не е добиено на гласање туку тоа се пренесувало од дедовци и прадедовци со векови.
Претседателот на здружението Олумчев рече дека ќе продолжат со секојдневни протести се до исполнување на нивните барања меѓу кои е и заштита на името на Република Македонија и заштита на македонскиот идентитет.
Од ВМРО ДПМНЕ соопштија дека средбата била неформална.
– Мицкоски ги соопшти ставовите на ВМРО-ДПМНЕ за уставното име на Република Македонија и актуелните случувања околу капитулантскиот договор на Зоран Заев. Воедно, Мицкоски изрази разбирање за загриженоста на граѓаните околу штетниот договор, наведуваат од партијата.