Мирослав Ѓукиќ беше во право пред почетокот на Светското фудбалско првенство во Русија во поглед на амбициите на Србија за минување на групната фаза. „Само да не дозволиме да се вадиме против Бразил“, рече менаџерот на белградски Партизан во пресрет на дуелите на репрезентацијата на северниот сосед во Е конкуренцијата.
https://www.youtube.com/watch?v=FuuVHSaH2o4
И без тоа беше јасно оти патот до осминафиналето за „орлите“ водеше преку Костарика и Швајцарија, „кариоките“ беа само прилика за уживање на мундијалската сцена. Но, наместо тоа, се случи спротивното. Костариканците беа архивирани, Швајцарците не, па поправниот за составот на Младен Крстаиќ беше најтешкиот можен испит.
Бразил триумфира во меѓусебниот меч со 2:0 за прво место во групата Е и судир со Мексико во осминафиналето. Паулињо погоди во 36. минута, Тиаго Силва во 68. минута за нови три бода за тимот на Тите.
„Имавме периоди во кои можевме да го загрозиме Бразил, но тоа е, сепак, фудбалска велесила. Честитки до играчите за залагањето, за одговорноста, за дисциплината. Заслужија почит во Србија и мислам дека треба да се вратат со дигнати глави. Генерално, сите три меча ги одигравме добро, квалитетно, во некои моменти бевме подобри од ривалите меѓутоа таков е фудбалот. Вториот натпревар со Швајцарија можеби нè „исече“. Тешко е да се вадите со Бразил меѓутоа се обидовме и дадовме максимум“, рече српскиот селектор Крстаиќ по средбата.
https://www.youtube.com/watch?v=JTMx9txw6VM
Втор патник во нокаут фазата од групата Е е селекцијата на Швајцарија која ремизира (2:2) со, веќе елиминираната, Костарика. Блерим Џемаили во 31. минута и Јосип Дрмиќ во 88. минута реализираа на Швајцарците, Кендал Вастон во 56. минута и Јан Зомер (автогол) во третата минута од судиското продолжение беа стрелци на погодоците за Костариканците.
Србија – Бразил 0:2 (0:1)
Стадион: „Откритие арена“ во Москва. Гледачи: 44.190. Гл. судија: Алиреза Фагани. Асистенти: Реза Сохандан и Мохамадреза Мансури (сите тројца од Иран). Ж. картони: Матиќ, Љаиќ, Митровиќ (Србија). Стрелци: Паулињо 36’, Т. Силва 68’ за Бразил.
Србија (формација 4-2-3-1): Стојковиќ – Коларов, Вељковиќ, Миленковиќ, Рукавина – Милинковиќ-Савиќ, Матиќ – Костиќ (Радоњиќ 82’), Љаиќ (Живковиќ 75’), Тадиќ – Митровиќ (Јовиќ 89’). Селектор: Младен Крстаиќ.
Бразил (формација 4-2-3-1): Алисон – Марсело (Филипе Луис 10’), Миранда, Т. Силва, Вагнер – Каземиро, Паулињо (Фернандињо 66’) – Нејмар, Кутињо (Аугусто 80’), Вилијан – Габриел Жезус. Селектор: Тите.
СП 2018
Група Е
Резултати, 3 коло
Србија – Бразил 0:2
Швајцарија – Костарика 2:2
Табела: Бразил 7, Швајцарија 5, Србија 3, Костарика 1.
Група Ф
Резултати, 3 коло
Јужна Кореја – Германија 2:0
Мексико – Шведска 0:3
Табела: Шведска 6, Мексико 6, Јужна Кореја 3, Германија 3.