Златко Далиќ е најуспешниот селектор во историјата на фудбалската репрезентација на Хрватска. Поранешниот играч од средниот ред на сплитски Хајдук успеа со „коцкестите“ до финале на Светско првенство во што не успеа ниту еден негов претходник иако нацијата во континуитет има играчи со капацитет за таков дострел. Блиску до тоа беше легендарниот Мирослав Ќиро Блажевиќ кој го предводеше националниот тим до трето место на СП 1998 година во Франција. И никој друг, а се изредија доста познати тренерски имиња – од Дражен Јерковиќ, преку Мирко Јозиќ, Ото Бариќ, Златко Крањчар, Нико Ковач, Анте Чачиќ, Славен Билиќ, Игор Штимац, итн.
Далиќ ја доведе Хрватска до работ на фудбалска бесмртност. На сцена стапи тивко, без помпа. Но, и со голема доза на скептичност во јавноста во поглед на неговиот капацитет за справување на карактерите на „коцкестите“ ѕвездички. Фудбалскиот сојуз му укажа доверба по разделбата со Анте Чачиќ во финишот на квалификациите за СП 2018, остана и за баражот, а со настапите на тековниот мундијал ја зацементира својата позиција на клупата.
За кариерата на Златко Далиќ кружат анегдоти во јавноста, но и бројни ритуали како што е случај и со голем број на спортисти и спортски работници. За хрватскиот селектор, на пример, се знае дека на ден на натпревар не користи мобилен телефон, не разговара со никој и ништо не јаде. Специфичен е во кругот на луѓе кои добро го познаваат пришто се издвојува еден детаљ што особено го привлече вниманието на медиумите. Се однесува на барањето во 1995 година до тогашниот директор на „Вартекс“ за отказ на неговата сопруга.
„Се вработив во „Вартекс“ во 1995 година кога Тони имаше две години. Работев во делот за продажба, но само два месеца. Тони го запишавме во градинка и, како и сите деца, еден ден требаше да оди на приредба. Бидејќи немавме никој што ќе ни излезе во пресрет за помош, решивме, сепак, јас да ја жртвувам мојата кариера. Покојниот директор Анѓелко Херјавец честопати потоа прераскажуваше дека Златко бил првата личност што го замолила за отказ на својата жена“, изјави сопругата на Златко Далиќ, Даворка во една прилика.
Златко Далиќ е роден во Ливно, БиХ на 26 октомври во 1966 година, но живее и работи во Хрватска чие државјанство поседува. Од 1992 година е во брак со Даворка Пропадало со која имаат два сина – Тони и Бруно.
„Почнавме од нула. Како дечко и девојка сакавме да направиме нешто во животот, сакавме нешто заеднички да изградиме. Имавме подеми и падови, понекогаш се наоѓавме пред ѕид, но успеавме да ја пребродиме секоја пречка. Во Даворка имам неизмерна поддршка во ова што го работам за што сум ѝ неизмерно благодарен. Синовите ги поттикнуваме да бараат место во системот преку образованието, а не низ тоа кои сме и што сме. Ги насочуваме да не се загубат во несакан правец“, вели Златко Далиќ.
Во сениорската кариера настапуваше за Хајдук, Динамо Винковци, Будуќност, Вележ и Вартекс. Како тренер, пак, ги водеше Вартекс, Риека, Динамо Тирана, Славен Белупо, Ал Фајсали, Ал Хилал, Ал Аин, а од есеноска е на кормилото на Хрватска.