Бројот на загинати во пожарите во Грција се искачи на 81, а и понатаму е непознато колку лица се исчезнати, соопштија доцна синоќа од противпожарната служба на Грција. Според портпаролот на грчката влада, хоспитализирани се 60 возрасни лица, од кои 11 се во критична состојба и 4 деца, вон животна опасност.
Евангелос Бурнус, градоначалникот на Рафина, општината погодена од катастрофалните пожари во интервју за МИА вели дека бројот на загинати ќе достигне до 100. Тој заедно со жителите учествувал во гаснењето на пожарите, додека и самиот останл без покрив над главата.
Потрага по исчезнатите
По гаснењето на огнот, активностите на пожарникарите, припадници на армијата, полицијата и доброволците се насочени кон пронаоѓање на исчезнати лица.
Грчката противпожарна служба, ги повика роднините на исчезнатите,денес и утре, да го посетат одделот за судска медицина на атинскиот Универзитет за да се информираат за процесот за идентификација на загинатите.
Портпаролката на противпожарната служба на Грција, на синоќешната прес конференција, рече дека се забранува употребата на дронови во областите погодени од пожарите.
Шефот на грчката форензика најави дека до сабота ќе биде завршена идентификацијата на околу 62 тела од загинатите, чиј број го опиша како досега невидена човечка трагедија.
Според Никос Каракукис најголем број загинале или од изгореници или се удавиле во морето во обид да се спасат од огнот. Идентификацијата оди тешко и ќе се базира единствено на ДНК тестирања.
Финансиска помош за обнова
Според градоначалникот Бурнус она што засега е направено е што за сите кои останаа без домовите обезбедено е засолниште, храна, медицинска нега и психолошка поддршка, а обновена е во голема мерка и јавната инфраструктура, вода и струја.
-Она што го бараме од сите, од целиот свет, од сите краишта на планетата е финансиска помош на сметката на општина Рафина или на сметката на владата за да се поправи инфраструктурата, вели градоначалникот Бурнус за МИА.
Грчката влада поради големиот интерес и солидарност од внатрешноста, но и на меѓународно ниво, отвори специјална банкарска сметка во Банката на Грција, за донации од странство за погодените во катастрофалните пожари.
За сите оние кои што сакаат да донираат, бројот на сметката е:
23/2341195169
IBAN GR4601000230000002341195169
-На оваа сметка, ќе имаат можност да донираат странски држави, компании, но и граѓани од Грција и странство, соопштуваат од грчката влада и објаснуваат дека целта е обнова на погодените области и на јавната инфраструктура, како и санирање на штетите.
Со сметката ќе управува тричлена комисија со учество на претседателот на парламентот, на министерот за инфраструктура и транспорт и министерот за финансии.
Државата учествува со 20 милиони евра од Заводот за вработување, министерството за финансии со 10 милиони, а со исто толку и грчкиот Парламент.