Основното јавно обвинителство за гонење на организиран криминал и корупција поведе предистражна постапка по допрен глас, заради постоење на индиции за повреда на законот при постапки на доделување на договори за јавни набавки во Министерството за здравство.
-Предистражната постапка е како резултат на објавените написи од страна на повеќе медиуми во Република Македонија во врска со неправилностите при спроведување на постапките за јавни набавки во Министерството за здравство. Предметот се однесува на постапката за јавна набавка за биореагенси и тестови на крв во износ од 35 милиони евра и за набавка на лекови од веледрогерија за потребите на јавните здравствени установи без тендерска постапка во износ од 24,6 милиони денари, се вели во соопштението.
На крајот на минатиот месец, НОВА објави дека на големиот тендер за реагенси се јавила само една фирма- АХР ЛАБ увоз-извоз ДООЕЛ Скопје, (друштво со ограничена одговорност) која е формирана на 18.04.2018 годинава – во момент кога во Министерството за здравство беше најавен големиот тендер за реагенси со кој министерот Венко Филипче најави голема заштеда во здравството, велат извори за НОВА кои се директно вклучени во бизнисот со реагенси.
Од документите во Централен регистар се гледа дека фирмата е регистрирана со странски капитал, како микро фирма со влог од само 5000 евра.
По реакциите во јавноста, министерот за здравство објави дека тендерот е стопиран бидејќи првичната евалуација покажала одредени неправилности во документацијата.
Фирмата АХР ЛАБ која е носител на дејност, тврди дека не поднеле понуда на тендерот за реагенси.
Државна комисија за жалби по јавни набавки пак, ги прифатила жалбите на трите фирми од тендерот и утврдила дека Министерството за здравство прекршило најмалку 7 членови од законот јавни набавки. Поради ова Министертвото за здравство треба да плати 78 000 денари на овие фирми заради сторена грешка и официјално да го поништи тендерот на кој имаше само една понуда.
Комисијата за жалби, дека со ваквите спецификации Министерството навело услови со кои се фаворизира германското претставништво на американската фармацевска компанија АБОТ.
„Поради сторена битна повреда на законот во постапката на доделување на договорот за јавни набавки предвидено со член 210 став 1 алинеја 3 од Законот за јавни набавки кое со никакво дополнително постапување договорниот орган не може да ја исправи Државната комисија за жалби по јавни набавки одлучија да ја поништат тендерската документаци по оваа јавна набавка“, се вели во образложението на Државната комисија за јавни набавки, објави Слободен печат.
За Комисијата е особено проблематичен делот од договорот каде е предвидено дека Министерството за здравство треба да исплати на носителот на набавката штета од 5 милиони евра во случај некоја од здравствените установи да не порачуваат реагенси од оваа фирма.
Решението на Комисијата е конечно и Министерството за здравство мора да постапи по него.