Лицето кое со автомобил денеска удри во заштитната ограда на британскиот Парламент и повреди неколку луѓе ќе одговара за тероризам. Тој е уапсен и единствено се знае дека има меѓу 20 и 30 години.
Лондонската амбуланта служба соопшти дека двајца пациенти се пренесени во болница со повреди кои не се опасни по живот. Се работи за велосипедисти и пешаци.
Уапсениот бил сам во автомобилот и досега не е пронајдено оружје.
-Во оваа фаза, ние го третираме ова како терористички инцидент и истрагата сега ја води единицата за борба против тероризам, соопштија од Скотланд Јард.
Напаѓачот е во притвор во полициската станица во јужниот дел на Лондон и возилото се претресува.
Голем број очевидци изјавија дека сребрената Форд Фиеста, која се движела кон запад, се чини намерно ги погодила пешачите и велосипедистите, по што се завртела во спротивната лента.
Би Би Си објави снимки на кои се гледа моментот кога возилото оди преку пешачки премин пред да удри во безбедносната ограда од челик и бетон.
Инцидентот се случил во 7.37 минути по локално време, кога Парламентот не заседавал.
Метро станицата Вестминстер е затворена, исто така и улиците околу Милбанк, Парламент сквер и Викторија Тауер гарденс.
Медиумите се оддалечени од самото место, а полицијата ги активира мерките предвидени за терористички акти. Парламентот во моментов не заседава.
На фотографии објавени на социјалните мрежи се гледа како полицајци изнесуваат едно лице со лисици од автомобилот.
Портпаролот на амбулантската служба во Лондон изјави дека двајцата што се во болница имаат “повреди за кои не се верува дека се сериозни”, а на местото на настанот им е пружена помош на останатите кои имале мали повреди.
Во Велика Британија минатата година беа извршени низа напади при што вкупно загинаа 36 лица, а 200 беа повредени. Одговорност за четири напади презеде Исламска држава.
Во нападот од март 2017 година, 52-годишниот Халид Масуд со автомобил усмрти четири пешаци на Вестминистерскиот мост, а потоа со нож избоде до смрт невооружен полицаец пред британскито Парламент. Напаѓачот беше застрелан од полицијата.