По паузата, во Кривичниот суд попладнево продолжи слушањето на „бомбите“ кои СЈО ги приложи како докази во предметот „Титаник“.
Во една од нив, Протуѓер и нарачува на Јанкулоска да провери преку нејзините контакти, дали сопругата на експретседателот на државата, Бранко Црвенковски, Јасна, поседува имот во Хрватска.
-Ни треба потврда дали е тоа лице. Чуј се со Горан Трајковски, вели Протуѓер, бидејќи тоа според него ќе направело „пресврт во кампањата“.
Јанкулоска во следен разговор му потврдува дека проверувале во регистарот на државјани и во регистарот на дијаспората. Протоѓер и’ дава насоки да провери преку сестра и’ на сопругата на Црвенковски, која работела во Амбасадата кај Љубиша Георгиевски.
-Ни Дачиќ не знае каква услуга сум побарала, оти и он е комуњар, знаеш, вели Јанкулоска.
-Ти вртам за да знаеш како да го спакуваш, додава Јанкулоска. Таа подоцна на Протоѓер му потврдува дека на таа адреса во Хрватска, семејството кое живее таму е на Јасна Црвенковска, сопругата на Бранко Црвенковски.
Јанкулоска, според разговорите, потоа прави нарачка до Антикорупциска да отворат предмет.
-Ај кажи Антикорупциска да си имаат предмет за имотот на Б.Ц. Јави им се на Борче и на Љубинка, охрабри ги!, му вели Јанкулоска на Иво Котески.
На крајот на разговорот Јанкулоска уште еднаш му вели на Котески да сврти некој телефон и да се јави на тогашниот претседател на комисијата Воислав Зафировски.
Од следниот разговор меѓу двајцата сопартијци се дознава дека Антикорупциска ја послушала партиската наредба, односно „се охрабриле“ да постапуваат.
Во досегашниот тек од рочиштето слушнати се речиси 50 разговори од вкупно 1.063 аудио снимки. Во нив најчесто разговараат Протуѓер и Јанкулоска, а се однесуваат на прилозите објавени на А1 дека секој вработен во државната администрација треба да предложи по 15 гласачи, а она што објавувал Канал 5, и за работата на тогашниот Државен јавен обвинител Љупчо Шврговски.