Со воведни говори на одбраната во Кривичниот суд во Скопје и денеска продолжува судењето за настаните во Собранието на Република Македонија од 27 април 2017 година.
Судскиот процес започна во средата кога воведен говор имаше обвинителката Вилма Рускоска и адвокатите на дел од обвинетите, а продолжи вчера со воведни говори на адвокатите на поголем дел од обвинетите. Покрај за денеска, ново судско рочиште е закажано и за в понеделник.
Обвинителката Русковска во воведниот говор истакна дека има докази со кои ќе ги потврди наводите од обвинението за сторено кривично дело терористичко загрозување на уставниот поредок, а одбраната тврди дека не постојат докази кои укажуваат на тоа.
Вчера, одбраната започна со воведните зборови, во кои пред судот го негираа обвинението против нивните клиенти. Бранителите тврдат дека обвинетите не сториле никакво кривично дело, а најмалку тероризам, уривање на уставниот поредок или акт на насилство.
Дончо Наков кој е бранител на обвинетите Љубен Арнаудов, Владо Јовановски и Богдан Илиевски – Бетмен и Абдуљифета Алими, рече дека тие немаат вина и се товарат за искажани зборови односно сториле „тероризам со зборови, а не со дела“.
Адвокатот на пратеникот Љупчо Димовски, на Игор Дурловски и на Мунир Пепиќ, во одбраната на своите клиенти праша дали присуството на граѓани во Собранието без никаков акт на насилство може да се третира како обид за уривање на уставниот поредок.
За Димовски, како што рече Миланов, со снимки од јавни настапи ќе докажува дека не дал наредба да се отворат вратите на Собранието, туку тоа што гестикулираал со рацете го правел постојано.
Саша Дуковски, адвокат на Митко Чавков и на Богдан Илиевски оцени и дека обвинението содржи голем број страници, но ништо не кажува.
-Нема докази за тоа што обвинетите се обвинети. За ова дело треба да има директна умисла, рече Дуковски, кој ја доведе во прашање одговорноста на Чавков за насилствата, истакнувајќи дека уште двајца според хиераријата имале одговорност, но никој од нив не е обвинет.
Вкупно обвинети се 33 лица од кои 31 за терористичко загрозување на уставниот поредок, а две за помагање. На обвинителната клупа се Љубен Арнаудов, Сашо Василевски, Крсто Мукоски, Љупчо Димовски, Јохан Тарчуловски, Митко Чавков, Митко Пешовски, Душко Лазаров, Горан Јошевски-Леви, Оливер Поповски, Оливер Радулов, Сашко Марковски, Мунир Пепиќ, Абдуљфета Алими, Елена Доцевска-Божиновска, Иван Цветановски, Борис Дамовски, Богдан Илиевски-Бетмен, Владо Јовановски, Игор Дурловски, Стефан Младеновски, Михаил Младеновски, Захарие Симовски, Младен Додевски, Јане Ченто, Горанче Ангеловски, Игор Југ, Илија Славески, Влатко Трајков, Вилијам Михајловски, Никола Митревски-Кољо, Александар Василевски-Нинџа и Митре Питроповски.
Судијката Кацарска закажа вкупно 37 термини за главна расправа и претходно најави дека се очекува на денешното рочиште да завршат воведните говори на одбраната.