Еленко Миланов, бранител на Игор Дурловски, Мунир Пепиќ и Љупчо Димовски, на денешното рочиште за настаните од 27 април кажа дека тие не се винови и оти ќе докаже дека немаат никакво кривично дело.
– Дали присуството на граѓани во Собранието без никаков акт на насилство може да се третира како обид за уривање на уставниот поредок, праша Миланов.
Љупчо Димовски, според него, не презел никакво дејствие, а Игор Дурловски воопшто не бил во групата што се движела и влегла во Собранието, туку дошол половина час по упадот и никого не поттикнувал на насилство. Бил само во пленарната сала каде немало насилство.
За пратеникот Димовски, како што рече Миланов, со снимки од јавни настапи ќе докажува дека не дал наредба да се отворат вратите на Собранието, туку тоа што гестикулираал со рацете го правел постојано.
-За ова судот ќе се увери од снимките што ги доставивме, односно дека тоа го прави махинално и воопшто не е свесен за тоа, рече Миланов.
Според обвинителството, Димовски со одредена гестикулација на рацете им дал знак на некои од сообвинетите да ги отворат вратите на Собранието.
За Пепиќ рече дека ќе докаже оти воопшто не бил во салата 3. На протестот на „За заедничка Македонија“ Пепиќ бил службено како вработен од Агенцијата за разузнавање и следел едно лице. Тоа лице влегло во Собрание па и тој морал да влезе заедно со него.
Денешното рочиште започна со воведни зборови на бранителите.
Тие пред судот го негираа обвинението против нивните клиенти. Бранителите тврдат дека обвинетите не сториле никакво кривично дело, а најмалку тероризам, уривање на уставниот поредок или акт на насилство.
Дончо Наков кој е бранител на обвинетите Љубен Арнаудов, Владо Јовановски и Богдан Илиевски – Бетмен и Абдуљифета Алими, рече дека тие немаат вина и се товарат за искажани зборови односно сториле „тероризам со зборови, а не со дела“.