Со воведен говор на бранителот Дончо Наков денеска продолжи судењето за настаните од 27 април во Собранието на Република Македонија за кои се обвинети 33 лица, од кои 31 одговараат за „тероризам“, а две за „помагање“.

Наков е  бранител на обвинетите Љубен Арнаудов, Абдуљ Фетаи, Владо Јовановски и Богдан Илиевски – Бетмен.

Владо Јовановски, Богдан Илиевски, Игор Дурловски и Борис Дамовски само за кажан збор се обвинети за тероризам, рече адвокатот Донче Наков во воведниот збор за случајот “Крвавиот четврток”.

– Доколку сметале колегите од обвинителството дека пишаниот збор е кривично дело, можеле да го опфатат со друг член, но и и со тероризам, истакна Наков.

Тој говорите на обвинетите, кажани на 27 април 2017 година пред Собранието, со кои според обвинителството ја разгореле толпата, ги нарече поблаги дури и од говорите на Шарената револуција, на протестантите пред Калето или на СДСМ пред Владата.

-Богдан Илиевски. Архитект. Од семејство на правници. Мајка му е позната колумнистка.Обвинителството го обвинува Илиевски дека со една реченица ја разгорел насобраната толпа за да влезе во Собранието. Но, оваа реченица е кажана дури 40 минути пред народот да влезе во Собранието. Потоа следуваат смирувачки пораки и дури им вели на луѓето да седнат, исткана Наков.

За актерот Јовановски пак рече дека во своите говори секогаш кажувал цитати и мудри мисли од историски личности и пеел песни.

-Владо Јовановски не треба посебно да го претставувам. Нормален човек со нормално семејство и со кредити, како што тој вели. Патриот и емотивен тип, како што вели Владимир Милчин, рече адвокатот за актерот Владо Јовановски и додаде дека неговиот клиент не е терорист.

За Љубен Арнаудов, кој е обвинет за терористичко загрозување на уставниот поредок и безбедноста, бил успешен гинеколог со 37-годишна кариера и над 15 илјади породувања.

-Абдулфетах Аљими. Обичен полицаец. Има дадено гаранција за Зијадин Села, каде што тој ја даде својата куќа како гаранција дека нема да бега”, рече Донче Наков.

Според најавите од судијката Добрила Кацарска, се очекува на денешното рочиште да завршат воведните говори на одбраната.

Во меѓувреме, група граѓани со знамиња протестираат пред Кривичен суд.

Првото рочиште за настаните во Собранието на 27 април се одржа вчера со воведни говори на обвинителката Вилма Рускоска и адвокатите на дел од обвинетите.

На обвинителната клупа во судот вчера седнаа Љубен Арнаудов, Сашо Василевски, Крсто Мукоски, Љупчо Димовски, Јохан Тарчуловски, Митко Чавков, Митко Пешовски, Душко Лазаров, Горан Јошевски – Леви, Оливер Поповски, Оливер Радулов, Сашко Марковски, Мунир Пепиќ, Абдуљфета Алими, Елена Доцевска – Божиновска, Иван Цветановски, Борис Дамовски, Богдан Илиевски – Бетмен, Владо Јовановски, Игор Дурловски, Стефан Младеновски, Михаил Младеновски, Захарие Симовски, Младен Додевски, Јане Ченто, Горанче Ангеловски, Игор Југ, Илија Славески, Влатко Трајков, Вилијам Михајловски, Никола Митревски – Кољо, Александар Василевски – Нинџа и Митре Питроповски.

Судијката Кацарска која го води предметот закажа вкупно 37 термини за главната расправа