Екипите со македонски интернационалци ќе мора да се задоволат со настапи во групите во Лига Европа оваа есен. Особено болна е елиминацијата на Динамо Загреб кој во само три минути дозволи да прими два гола на „Максимир“ што на крајот значеа и пораз од Јанг Бојс со 1:2. Првиот меч во Берн заврши без победник (1:1), па швајцарскиот претставник ќе биде дел од европската клупска елита во сезоната 2018/19. „Модрите“ поведоа со голот на Хајровиќ во седмата минута, гостите израмнија во 64. минута по ударот од белата точка на Хоару, а истиот фудбалер се запиша во листата на стрелци и две минути подоцна за голема радост на неговата екипа која ќе дебитира во групната фаза во Лигата на шампиони. Аријан Адеми беше стартер кај домашните, но поради повреда беше заменет во 32. минута.
Второто по ранг натпреварување на УЕФА е утеха и за Види МОЛ на Бобан Николов. Унгарскиот состав ремизира против АЕК кој ќе биде дел од групите во ЛШ благодарение на триумфот со 2:1 во воведните 90 минути во Унгарија. Обата гола на стадионот „Спирос Луис“ во Атина беа постигнати во период од девет минути во второто полувреме. Грчкиот состав поведе со гол од пенал на Манталос во 48 минута, израмни Него во 57. минута, но тимот od Шекешфехервар до втор погодок за продолжение не успеа да дојде. Македонскиот репрезентативец беше во почетните 11 на тренерот Марко Николиќ и го одигра само првото полувреме.
Трет патник во групите во ЛШ преку бараж двомеч е Ајакс чии фудбалери одиграа без голови во реваншот со Динамо во Киев. Холандскиот тим во минатата недела славеше со 3:1 на својата „Амстердам арена“.
Вечерва ќе бидат познати и последните три учеснички во групите во ЛШ. Црвена звезда му гостува на Салцбург по 1:1 во првата средба во Белград, со идентичен резултат на стадионот „Тумба“ во Солун ќе истрчаат ПАОК и Бенфика додека ПСВ Ајндховен ќе биде домаќин на БАТЕ Борисов по победата со 3:2 во Белорусија.
Лига на шампиони, плејоф
Резултати, реванши
Динамо Загреб – Јанг Бојс 1:2 (1:1)
АЕК – Види МОЛ 1:1 (2:1)
Динамо Киев – Ајакс 0:0 (1:3)
Вечерва играат
Салцбург – Црвена звезда (1:1)
ПАОК – Бенфика (1:1)
ПСВ Ајндховен – БАТЕ Борисов (3:2)
Во загради се резултати од првите средби.