Владата на Германија не го сменила ставот за неменливост на границите на Западен Балкан, кој канцеларката Ангела Меркел јавно го искажа на 13 август, говорејќи за територијалните разграничувања. Таа истиот став го повтори и во разговорот со американскиот претседател Доналд Трамп, се наведува во одговорот на германската Влада за црногорскиот весник „Побједа“.
„Канцеларката Меркел повтори дека територијалниот интегритет на државите од Западниот Балкан е воспоставен и е неповредлив. Ова е и понатаму став на Сојузната Влада. Владата силно ги поддржува напорите на ЕУ во посредувањето за постигнување на одржливо решение меѓу Србија и Косово“, се потенцира во изјавата на германската Влада за весникот „Побједа“.
Косовскиот премиер Рамуш Харадинај, по средбата на државниот врв на Косово што се одржа утрово во косовското Собрание, им изјави на новинарите дека е постигнат договор во Брисел да не се расправа за размена на територии меѓу Косово и Србија, јави дописникот на МИА од Приштина.
На ненајавениот состанок се собраа членовите на делегацијата која пред неколку недели оствари официјална посета на Брисел, во состав Харадинај, претседателот на Косово Хашим Тачи, собранискиот спикер Кадри Весели и вицепремиерите Беџет Пацоли, Фатмир Лимај и Дардан Гаши.
Фактот дека германската канцеларка Ангела Меркел и американскиот претседател Доналд Трамп разговарале за Косово и што дадоа поддршка за разговорите кои водат кон решавање на ова прашање е голем исчекор и доказ дека работите се промениле и тоа во корист на Србија, изјави за „Блиц“ шефот на српската дипломатија Ивица Дачиќ.
– Голем исчекор е во прашање и доказ дека работите се промениле. Сепак, тешка борба ни престои, а од тие на кои треба и понатаму да се влијае, најважна е Германија, кажа Дачиќ.
Тој ја коментираше изјавата на Хашим Тачи дека се спротиставува на етничките граници, оценувајќи дека Тачи не е наивен и дека знае оти на „Србија не и се брза со неизбежното признавање на Косово“.
– Приштина ја изгуби поддршката, нема веќе став дека се е решено. Тие тоа никако да го сфатат, па затоа и така трагично ги доживуваат овие изјави од светот, како и повлекувањата на признавањата на Косово, истакна Дачиќ.
Вниманието на српската јавност, според Блиц, предизвикала и изјавата на хрватскиот премиер Андреј Пленковиќ дека е „за почитување на границите”, повикувајќи се на мислењето на Бадинтеровата комисија, за која Дачиќ изјави дека е лицемерна.
– Кога станува збор за Бадинтеровата комисија, таа говори за меѓурепубличките граници, никаде не се споменуваат покраините, така што сите оние што го признаа Косово тоа го направија спротивно на ставот на Бадинтеровата комисија.Тука спаѓа и Хрватска и лицемерно е што тие се повикуваат на таа комисија, изјави Дачиќ.