Драстично е скратено времетраењето на железничката релација од Хонг Конг до Кина. Со новиот супербрз воз што е промовиран викендот, патувањето трае само 14 минути наместо еден час како што беше случај досега. Линијата чие крајно одредиште е Шенжен е долга 26 километри.
На проектот се работеше осум години и за негова реализација се потрошија десет милијарди долари. Системот е направен за дневно опслужување на 80.000 патници од финансискиот центар на Азија што брои околу седум милиони луѓе до континенталниот дел на Кина, поточно, провинцијата Гуангдонг која важи за центар на производната индустрија во најмногубројната земја на светот.
Патниците во возот ќе бидат во постојан контакт со кинеската мрежа на брза железница што сообраќа на 44 дестинации меѓу кои западниот град Сиан, Пекинг и Шангај. Проектот, сепак, го следат и контроверзи.
Како пример се истакнува законот за заеднички пунктови на терминалите што го донесоа властите во Хонг Конг. Тоа значи дека проверката на кинеските државјани ќе се одвива на терминал наместо на административната граница. И за првпат официјален Пекинг ќе спроведува закони на тлото на Хонг Конг.
Тоа е причина за протести на продемократски групи во земјата за кои заедничките пунктови претставуваат поткопување на автономијата на Хонг Конг што е воведена врз основа на договор за една земја со два засебни система при интеграција на поранешната британска колонија во Кина.