Емилија Александрова е првата од осумте пратеници на ВМРО ДПМНЕ која јавно се огласи по вчерашното гласање во македонскиот Парламент. Таа во изјава за „Лидер“ истакна дека тешко ја доживеала и преживеала целата ситуација.
„Најпрвин сакам да потенцирам дека синоќа во Собранието на Република Македонија се донесе одлука за отпочнување на постапка за амандманска расправа за измени на Уставот. А, за тоа како ќе биде крајното двотретинско гласање, сепак ќе зависи од власта, односно колку е таа спремна за прифаќање на условите што се наведени во синоќешното соопштение до јавноста“, изјави Александрова за „Лидер“.
Одлуката беше навистина тешка со оглед на сериозноста на ситуацијата како во државата така и во политиката и какви се бранувања таа ќе направи посебно во мојата партија. Но, јас и моите колеги цврсто веруваме дека тоа што дадовме шанса е правиот пат по кој треба да се движиме, нормално уште еднаш да напоменам со прифаќање на нашите услови, појаснува Александрова.
„Што се однесува на одлуката на партијата да не исклучи, лично ја доживеав многу тешко. Да се биде ВМРО-ДПМНЕ е вистинска чест и мене никогаш тоа чувство на припадност не можат да ми го одземат. Искрено жалам за нивната одлука кон нас, но не им се лутам. Верувам дека разумот на крај ќе преовладува кај сите, затоа што на крајот сите имаме заедничка цел“, заврши пратеничката која e исклучена од ВМРО-ДПМНЕ.
Непосредно по гласањето, претседателот на ВМРО ДПМНЕ, Христијан Мицкоски свика состанок на Извршниот комитет на партијата и по негов предлог беа исклучени од членство осумте пратеници кои, сепак, се изјасија „за“ отпочнување на уставни измени што го налага Договорот од Преспа со Грција.