Двапати за време на ручек, двапати попладне и само еднаш во централниот вечерен термин ќе игра Македонија на Светското ракометно првенство во Данска и во Германија во јануари во 2019 година. „Возниот ред“ на натпреварите и сатниците ги изготви и објави Светската ракометна федерација (ИХФ) пришто може да се забележи дека најпривилегирана улога во групата Б има Шпанија чија селекција ќе игра навечер во сите пет натпревари.
„Црвено-жолтите“ во мундијалската авантура ќе влезат на 11 јануари со меч против Јапонија од 15.30 часот. Нивни противник на 13 јануари од 14 часот ќе биде селекцијата на Бахреин за ден подоцна од 18 часот да играат против Хрватска. По вториот ден одмор на СП 2019 ќе следуваат дуелите со Шпанија на 16 јануари од 20.30 часот и во завршното коло на 17 јануари (18 часот) против репрезентацијата на Исланд кој е ривал и во квалификациската група за ЕП 2020.
Светското ракометно првенство во машка конкуренција ќе почне на 10 јануари и ќе трае до 28 во месецот. Градови домаќини во прелиминарната групна фаза ќе бидат Берлин и Минхен во Германија и Копенхаген и Хернинг во Данска. Мечевите во главната фаза по групи ќе се играат во Келн и Хернинг, полуфиналните пресметки во Хамбург додека распределбата на медалите (финале и за трето место) и за пласман од петтата до осмата позиција во „Јиск Боксен Банк“ во Хернинг.