Украинскиот претседател Петро Порошенко денеска потпиша указ за одлуката на Советот за национална безбеднос и одбрана за воведување воена состојба во Украина до 25 јануари 2019 година.
– Да се активира одлуката на Советот за национална безбедност и одбрана од 26 ноември 2018 за вонредни мерки за обезбедување на државниот суверенитет и независност на Украина и воведување на воена состојба во Украина, стои во документ објавен на сајтот на украинскот претседател.
Указот треба да го потврдат и пратениците во Врховната Рада.
Претходно Порошенко побара од Русија веднаш да ги ослободи украинските морнари и бродовите што беа задржани вчера во Керченскиот Теснец.
– Бараме итно да бидат вратени на украинската страна, рече Порошенко и повика на деескалација на кризата.
Украина соопшти дека шест морнари биле повредени кога руските погранични сили отвориле оган врз три украински бродови во близина на Керченскиот Теснец, а потоа биле уапсени. Русија и Украина веќе разменија обвиненија за инцидентот, што ги продлабочи тензичните односи меѓу нив, кои произлегуваат од руската аннексија на Крим во 2014 година и поддршката за сепаратистичкиот бунт во Источна Украина.
Рускиот министер за надворешни работи Сергеј Лавров го оквалификува како „провокација” тоа што украински бродови влегле во руските територијални води.
– Прекршени се клучните одредби од меѓународното право, не само во областа на поморскиот закон, туку и во општото меѓународно право, вклучувајќи ја и Повелбата на ОН за морско право од 1982 година и други меѓународни правни инструменти, кои постојано инсистираат сите земјите да го почитуваат суверенитетот на другите држави, рече Лавров, додавајќи дека провокацијата била спроведена под команда на највисокото раководство на Украина.
Лавров ја обвини Украина за употреба на „опасни методи” во Керченскиот Теснец
– Имаше нарушувања и беа употребени опасни методи, што може да создаде закани и ризици за нормалното движење на бродовите во овој морски коридор помеѓу Азовско и Црното Море, рече Лавров.
Австриската министерка за надворешни работи Карин Кнајсл, чија земја е ротирачкиот претседател на ЕУ, предложи утре да се одржи состанок на Комисијата за политика и безбедност на ЕУ поради ситуацијата во Керченскиот Теснец.
Генералниот секретар на НАТО Јенс Столтенберг соопшти дека по инсистирање на украинскиот претседател Петро Порошенко, попладне ќе биде одржан состанок на заедничката комисија на Алијансата со Украина.
Во неговото соопштение се истакнува дека НАТО целосно го поддржува територијалниот интегритет и суверенитет на земјата, вклучувајќи го и правото на пловење во нејзините територијални води, согласно меѓународното право.
Столтенберг и Порошенко утринава имале телефонски разговор за настаните во Азовското Море и Керченскиот теснец. Тоа прашање ќе биде единствена точка на дневниот ред на денешниот состанок.