Поранешниот шеф УБК, Сашо Мијалков денеска за првпат откако е приведен ќе излезе од истражниот затвор. Тој треба да биде спроведен во Основниот суд Скопје 1 на рочиштето за случајот „Титаник 2“.
Минатата недела Мијалков не беше спроведен на рочиштето за „Таргет- Тврдина“ (за кое и му е одреден притворот) со образложение дека судот немал доволно време да испрати наредба за спровод на обвинетиот до Истражниот затвор во Шутка.
Мијалков од 20 овој месец се наоѓа во притвор во Истражниот затвор во Шутка на барање на СЈО кое тврди дека тој имал намера да избега.
Изречениот притвор за Сашо Мијалков според неговите адвокати е политичко, а не правно решение. Во реакцијата адвокатите тврдат дека не постои никаква основа за мерките на претпазливост да бидат укинати и заострени, бидејќи, според нив, не е сменета ниту една околност во однос на моментот кога му се изречени.
Во неа уште се наведува дека определениот притвор е незаконски поради фактот што, според бранителите на Мијалков, тој повеќе од една година ги почитува определените мерки на претпазливост, се јавува на сите покани од судот и обвинителството.
Адвокатите поднесоа жалба до второстепениот суд и бараат укинување на ваквата мерка.